李嘉欣 (Michele) 最近為雜誌拍攝封面。著名形象總監Alvin Goh為她設計了多個破格造型,攝影師細膩捕捉Michele最自然的表情,活現真我、率性和高貴的一面。每個造型非常獨特,難以取捨,最終雜誌推出雙封面。
今年年頭一場突如其來的大病,讓Michele經歷了一段不平凡的驚險旅程,憶起那次病發經過,猶有如悸,她說︰「今年1月某個半夜,我突然心跳好快,每分鐘跳160,好唔舒服,但正值covid高峰期,去醫院要辦好多手續,我半夢半醒之間,先生(許晉亨Julian)就請醫生來屋企睇我,醫生即刻幫我安排病房。」
同場加映:忽然心動丨湯洛雯首次拍電影七日起貨嗌爽 栢天男演出租男友堅食蟲?
Michele續指老公一個細心舉動,加上溝通誤會,爭啲「愛你變成害你」,「醫生揸車離開途中,Julian見我睡意正濃,於是聯絡對方,問可唔可以畀我瞓一陣先入院。當時醫生以短訊回覆:『No』、『Hurry』,Julian見他寫『No Hurry』(不用急)就決定等我瞓一陣先。冇幾耐醫生來電,叫Julian即刻車我去醫院!原來醫生冇打標點符號,佢正確意思係『No! Hurry!』(不!很緊急!),如果我瞓着,我好可能唔會再醒!」
她迷迷糊糊,當時仍未知情況危急,還強撐跟家人說:「我冇事,我冇事,唔使擔心。」直至入醫院辦完手續,才知事態嚴重。「家姐(李嘉明)見到我時,我對眼已經係白濛濛一片,佢話很得人驚。」上到病房,護士竟然量測不到Michele的血壓,「手臂、大髀量唔到。肺科醫生話我有嚴重肺積水,所有內臟包括肝、腎已經停止運作,要即刻入深切治療部。直至抽完肺水,我終於唞得番氣。之後心臟科教授幫我檢查,check到我心臟先天性多咗一條血管,條血管好似短路咁亂跳,所以當時我個心其實唔係跳緊,而是震緊;160唔係心跳,而係心震,因為咁體內冇血輸送去內臟。」
聽完醫生報告,Julian一臉擔心,而正在家中等消息的兒子Jayden,同樣憂心忡忡,不斷致電媽媽追問最新情況,Michele︰「為免佢擔心,我只好氣若游絲安慰佢,『媽咪無事,唔使擔心呀』。後來我喺IG出post,佢睇完好嬲,問我點解咁大件事都唔話佢知。佢覺得自己已大個仔,我唔應該呃佢。其實當時佢先10歲,我好驚訝佢咁成熟。」
在加護病房48小時,Michele的情況才穩定。於農曆年過後,再接受導管消融手術,在大腿旁穿一條導管進入心臟,防止再有異常的心律不整:「好感恩,so far個心冇再亂咁跳。事後傭人姐姐叮囑我,有唔舒服一定要出聲,千祈唔好死頂!我覺得好有道理。」
至今14年的婚姻,Michele與丈夫甜甜蜜蜜,兒子Jayden轉眼已經11歲了,三人家庭生活滿載幸福快樂。隨著兒子長大,懂得照顧自己,夫妻亦漸漸重拾更多二人世界的美好時光,「兒子長大,Jayden忙著發展自己興趣,忙於學業,有自己社交生活。我同先生多咗私人享樂時間,多咗時間一齊外出吃飯,有時網上、雜誌睇到新餐廳介紹,我都會約佢去品嚐美食,欣賞唔同餐廳嘅特色裝潢,享受二人相聚嘅浪漫時光。」
此外,Michele也娓娓道出跟丈夫的甜蜜事,她說:「每逢過時過節,Julian必定會親筆寫心意卡送畀我,又會寫一啲好sweet嘅notes,10幾年都係咁,我好感動。又譬如每次食大閘蟹,佢望完一輪後,一定將最好最靚嗰隻留畀我,每一round都係咁,係一位好好先生。」坦言和丈夫之間沒有秘密,彼此都知道大家的手機密碼。當然甜蜜背後都有「吵大鑊」的時候,「我覺得嗌交都係一種溝通方式,起碼可以知道對方想法,明白雙方底線,之後可避免問題再出現。反而冷戰最傷感情,所以我哋從來唔會畀問題留過夜(才解決)。」
談到工作,Michele慶幸能夠成為一位演員,「我參選香港小姐入行,遇到好多難能可貴嘅演出機會。好開心可以拍到侯孝賢、王家衛及徐克等導演嘅作品。印象最深係以上海話演出《海上花》,很多鏡頭都係一take過,自由發揮度好高。而拍攝王家衛《墮落天使》時,最後一個鏡頭喺一間好細嘅麵館內取景,攝影師用超闊廣角鏡拍攝,拍出來嘅畫面扭曲變形,成功營造特殊氛圍!」
近年Michele作出新嘗試,參與馬來西亞地標項目The Sail「一帆風順」其中一座大樓的發展企劃,以Michele的「M」字命名,稱為「M Tower」。她對於獲邀參與此國際級建築項目,感到非常榮幸,又透露自己以低調為設計原則,以環保概念為基礎,於細節中加入奢華元素,塑造具現代風格的高雅效果。
撰文︰娛樂組