下流上車族丨林敏驄稱冇盡責任與兩子「疏堂」 網民認同重要過攞視帝：一嚿膠嚟咋

現年63歲的林敏驄，入行40年來首次參演劇集，頭炮作在《下流上車族》劇飾演車志明，演出細膩認真，令觀眾眼前一亮，亦贏盡收視和口碑。阿驄對於今次演出大呼過癮，他坦言能請得動他拍劇的，正是其老友兼無綫總經理曾志偉，「佢無咩誠意㗎，剩係電話留言畀我，問我做唔做，我話我收好貴㗎，佢話唔緊要，跟住搵人掟兩個麻包袋喺我門口，價錢就合理啦！」

同場加映：忽然心動丨湯洛雯首次拍電影七日起貨嗌爽 栢天男演出租男友堅食蟲？

{{hket:ul-video id="6937"}}{{/hket:ul-video}}

自劇集播出街後，阿驄差不多每天都緊張查看收視，又會到討論區看網民留言，他提起網民便十分興奮，「你知嗰班連登仔，如果唔通順實會鬧到狗血淋頭，但佢哋無鬧過，全部讚。好多朋友都話從來唔睇劇，但因為呢套劇，佢哋到時到候就坐喺電視前，連移民英國嘅朋友都話有追。我都好surprise網民咁期待，話我帶起追劇潮流？佢哋以為我用番蘇格蘭場嗰啲搞笑嘢，但估唔到我咁認真去做。其實我都唔係認真，我只係用真實啲嘅處理方法去演，因為有鮑姐、美儀咁好嘅演員，如果我亂咁搞就會嘥咗佢哋。而家咁處理幾好吖，啲戲出咗嚟，就連『哈比族』佢哋全部都做得好。」

{{hket:inline-image name="MAL08475.jpg"}}{{/hket:inline-image}}

一Cut機就講粗口

跟以好戲見稱的鮑起靜和江美儀合作，冇嚟正經的阿驄亦不敢怠慢，以專業態度跟二人大鬥演技。「不過我最怕啲演員太多表情，翁口翁鼻咁，太用力去演變咗唔自然。我自己睇番我哋嗰啲場口好自然，事前無特登去排練，埋位就做，喊好笑好，做完就講粗口，唔講粗口佢哋唔敢cut機。藝術係共通的，我都係用番我寫歌嗰種態度去做，我寫歌好似有條掣喺條頸到，一有好感動嘅嘢就會震，做戲都一樣，一到好感動就嚟料，無話計算定第幾句要喊。」

劇集最高收視曾錄得27.3點，阿驄很有信心最尾一星期會升到30點，又露口風叫觀眾攬住盒紙巾睇。在劇中飾演一名慈父的阿驄，現實生活中是慈父還是嚴父？他左顧右盼表示「我都無乜做過呢個（父親）責任。」兩個囝囝都品學兼優？「佢叻佢嘅事，佢自己識攞基因。大仔有玩夾Band，不過唔係我傳授畀佢，係佢自己學，我自己都好忙，唔得閒同佢一齊玩，我幾年先彈一次結他，而家啲細路好叻㗎！」阿驄坦言跟囝囝甚少見面，平時各有各忙，偶而會send短訊聯絡，笑言跟他們是「疏堂朋友」，「我都唔清楚佢哋有無拍拖，就算拍拖又唔使帶個女友畀我睇，仔大仔世界。」至於兩位兒子可有收看自己演出？阿驄笑指他們可能沒興趣看，寧願看日劇或美劇。

{{hket:inline-image name="MAL08414.jpg"}}{{/hket:inline-image}}

叫網民淘個獎送自己

阿驄這次的演技獲網民激讚，並狂推他成為視帝，阿驄聞言表示對獎項不太看重，「都唔知有咩對手，有咩對手我都唔驚，對手喺自己度。唔係話你有無信心攞，係你做嗰陣時已經要做到要攞到，你畀咗咁嘅水平，攞唔攞到已經唔關你事，已經係題外話，攞獎好多因素，又要睇你有無命水，所以好難講。啲網民咁認同，我就當攞咗㗎喇，奬係咩啫，一嚿膠嚟咋嘛，你畀我梗係受得起啦，唔畀咪當跌咗囉，叫啲網民淘一個返嚟囉，咪一樣，我覺得認同重要過個獎。」

文凱婷唱出一家人感覺

貴為「填詞鬼才」的林敏驄，除了親自為劇集主題曲《一家人》填詞作曲及與文凱婷合唱外，片尾曲《很久以前》以及插曲《想你》，亦由他填詞、作曲、編曲、監製及主唱一手包辦，當中亦發生了小插曲，「本來話11月先交片，突然間變咗做台慶劇，10月要出街，咁急情況下都唔知做唔做得切啲歌，最後搵咗兩隻舊嘅頂住先，好彩最後限期都交到，用咗幾日就完成。文凱婷嘅表現都OK呀，我想要佢唱到好有一家人的感覺，好似我個女咁，對佢嚟講亦唔難唱。」