陳煒(煒哥)將於本月底與醫生男友陳國強拉埋天窗，今日為劇集《黯夜守護者》進行最後一次宣傳，活動尾聲，監製吳冠宇率領眾演員送上一束鮮花及一張心意咭，令煒哥感動得眼濕濕。
同場加映：炎明熹參加《聲生不息》贏經驗賺友情 辛苦兼顧學業工作：唔想做壞榜樣
受訪時煒哥直言沒想過最後一個宣傳，大家公開祝賀她結婚，令她非常感動。婚期在即，煒哥表示開始着緊婚禮事宜，但婚紗仍未做好，所以仍未試身。談到現時要拍電影《無間一戰》又要籌備婚禮，可擔心壓力大影響皮膚？她笑指深層次護理應該沒時間做，只能整理頭髮和修指甲，「我啱啱拍戲都開到凌晨四點，只係得結婚當日有假放。」煒哥又透露日前在無預警下拍完一場爆炸場面，雖然是後期CG，但她也要做動作反應，「場戲講我開車門時突然爆炸，整個人向後飛，地上只得一張塌塌米，因為多一張會穿崩，我助手最擔心，不停叫我小心啲，擔心我喺婚禮前受傷。」
另外，煒哥接受無綫《 星光路上》 訪問時，談及父親今年四月因病離世，當時正忙拍劇集《回歸》，令她留有遺憾︰「我覺得好少時間陪佢。」煒哥又分享父女相處點滴︰「我知道佢成日攞我啲相畀啲朋友睇，聽到人哋讚美我就好開心。」她透露由18歲開始，父親每年為她拿「香港小姐」報名表格，但被她拒絕。主持問有沒有承諾過父親要做出成績？煒哥眼濕濕答︰「無特別講呢啲，但喺2018年我拎到『最受歡迎電視女角色』，同馬國明夾份搞慶功，我請咗爹哋嚟…（開始淚崩）當時爹哋好開心。」
同場的江嘉敏對於有網民批評她在《黯夜守護者》中聲線作狀，她強調：「對住媽咪同開live，語氣都會唔同啦，我唔會因為網民批評而唔開心， (今次扮學生感到吃力?)又無乜感覺，靠演技做好佢。」
之前陳敏之拉低車窗賣旗，捐了$10支持，卻遭網民狠批無戴口罩，又指她做善事只為拍片。敏之回應：「其實因為我都係東華三院學校畢業，嗰日我見到師妹賣旗，覺得好乖，喺車上其實我冇戴口罩，我都知係唔啱嘅，拍片都係想呼籲大家做善事，真係冇諗過咁複雜，話我捐$10咁少，如果我畀100或者$500都會畀人鬧，就算畀$1000萬，其實有人唔鍾意自己嘅都係會鬧，大家應該做多啲有建設性、有營養嘅事，我覺得(網民批評)真係好無聊。」
撰文：黃寶蓮