生命鬥士︳小鐵漢手術後兩周高燒 深夜入急症室折騰逾13小時 爸媽無助：其實只想去番兒童醫院

患有先天性心臟病、年僅5歲的「小鐵漢」Kansas，去年9月尾在兒童醫院「打大佬」，接受第3階段單心室循環手術，換上新心臟起搏器及重建單心室循環系統；此第6次的終極手術歷時8個鐘，在他平安過渡危險期後，卻因細菌感染引致肺炎，需重新插喉及兩次洗肺，所幸其後情況好轉出院。他本月12日再順利完成心導管手術，昨晚（26日）卻因發燒而入天水圍醫院急症室，卻因沒兒科而輪候數小時轉介至屯門醫院；到了屯門醫院後，卻因該院沒有心臟科，折騰逾13小時後仍未接受心臟科治療。對此，爸媽感到十分無助：「其實我只想去番兒童醫院，畀睇開佢嘅醫生，照個超聲波睇下個心啫......」

同場加映：

Sick問識答︳2歲幼童未懂說單字應接受評估 專家教2招增小朋友說話意欲

{{hket:ul-video id="6205"}}{{/hket:ul-video}}

小鐵漢媽媽昨晚7時許在Facebook專頁「小鐵漢媽媽」發帖，指兒子前晚（25日）開始發燒，昨日早上睇醫生後食藥成功退燒，惟昨晚卻突然發高燒，於是召喚救護車，被送至天水圍醫院急症室，「仲要呼吸好辛苦同好攰冇晒力......而家等緊急症，不過唔知等幾耐，最驚係上星期手術嘅併發症......每兩小時一次（新冠肺炎）檢測都係陰性，冇咳冇鼻水冇頭痛。」

至9時左右，小鐵漢爸爸Jayco亦在「小鐵漢媽媽」發帖，指被送入天水圍醫院急症室後，卻被告知該院沒有兒科，認為醫管局的系統及程序複雜及混亂，

「問佢可唔可以轉返去跟開阿仔Case同剛剛做完手術出院嘅兒童醫院，又話兒童醫院只接受兒科轉介，佢冇兒科，做唔到轉介......話要先轉去屯門醫院兒科，再喺屯門醫院嘅兒科轉介去兒童醫院先得，但由天水圍醫院去屯門醫院嘅醫護車要等到凌晨兩三點先有，又話如果你等唔到，你可以自己搭車去，不過要喺屯門醫院重新排過急症......鐵漢爸字，純粹寫吓而家嘅感受。」

折騰至今早6時半左右，媽媽再發帖，指兒子被轉入屯門醫院兒科後，因該院沒有心臟科而仍感徬徨；除了獲得退燒藥外，並沒有其他藥物及治療，

「我話，佢情況有機械心瓣、起搏器，屬高危（醫生曾咁講過），以往心臟科醫生會擔心有菌入落心瓣，會開住藥佢先，邊吊藥邊種菌（抽血）以防萬一；呢度，唔肯咁做！」

媽媽續指，雖然他們堅持轉介到兒童醫院，但院方卻指要等早上，巡房醫生方決定到如何處理，「話呢一刻！唔係心臟衰竭，唔會轉入兒童醫院，同樣要等早上巡房主診決定。我問，至少有心臟內科醫生睇睇佢先，唔需要資深的，好嗎？話：心臟科醫生都去晒兒童醫院喎。我手開始震，即係，見佢呢刻仲生存緊當無嘢，吓話？其實我只想去番兒童醫院，畀睇開佢嘅醫生，照個超聲波睇下個心啫，唔關『心』事你再掉番我仔去其他醫院，好嗎？」

焦急的爸爸Jayco今早近7時，亦在Facebook群組「巴打絲打「13親子育兒」Facebook Club」發帖，表示現時要等到中午主診醫生巡房，方可安排轉去兒童醫院，讓心臟科醫生治療兒子。通宵折騰過後，爸爸依舊無助，慨嘆：

「由999白車，到天水圍醫院，再畀人踢去屯門醫院，已經超過13小時 ，連一個屬於心臟科嘅普通觀察同治療都冇！機制同系統原來唔係用嚟救病人，絕對係拖延救援同治療。現場病房嘅前線都話冇辦法好無奈，話呢個係個流程嘅規定同限制。」

對此，一眾網民紛紛留言安慰小鐵漢爸媽，並為小鐵漢送上祝福， 「小鐵漢加油呀，一定要快快退燒，及早日康復！願主保守一切，平安渡過，盡快得到妥善安排照顧 」、「小鐵漢你一定要大步檻過呀！平安出院，加油呀！」、「加油呀！早知坐的士去其他醫院嘅急症」、「明白你哋嘅擔心，可能我自己由細到大都知自己個心有事......所以有咩事都真係會飛出瑪嘉烈。先希望小鐵漢無事，再萬一下次有事，可以有今次經驗。」 、「小朋友要頂住，屋企人要加油！」、「小鐵漢更大嘅杖都打過而且贏過，鐵漢爸請不要絕望，繼續堅持和加油！我哋再一齊集氣！」

對於網民「私家醫院收唔收? 係咪一定公院先接呢啲複雜的case？」的疑問，爸爸Jayco簡短地回覆道：「係呀。」此外，亦有不少網民呼籲有關當局正視類似問題，以減省不必要的流程，讓高危病人能獲及時治療。

小鐵漢經歷6次手術 再次完成心導管手術 爸媽報捷：盼機械心瓣頂到3年以上，詳情即睇：【下一頁】

U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】 

每朝索取《晴報》：精明生活．健康家庭．開心娛樂