人氣偶像組合MIRROR首次紅館演唱會《MIRROR.WE.ARE LIVE CONCERT 2022》開騷，MIRROR十二子以團隊歌曲掀開序幕，又唱又跳「焫」起全場氣氛，令現場尖叫聲此起彼落。除了合唱之外，大會特別安排他們各自有SOLO的演出，就算從未推出SOLO歌的陳瑞輝（Frankie）、邱士縉（Stanley）及邱傲然（Tiger）都有獨唱環節，為粉絲們帶來驚喜。
同場加映：童時愛上你丨高海寧曾劇接劇愧感人生零進步 勇敢做自己：不再為別人而活
首個紅館演唱會丨MIRROR化身全白紳士空降紅館 挑戰高難度半天吊好牙煙【下一頁】
獨唱表演由Jer柳應廷打頭陣，他率先獻唱陳奕迅的《黑夜不再來》，為一系列的暗黑風演出揭開序幕，隨後妖味十足的Jeremy（李駿傑）獨唱《半》，同樣妖住Chok的Frankie穿上一身銀色造型，以巨型鎖鏈纏身獻唱麥浚龍的歌曲《鶴頂紅》，隨後「大表哥」Stanley的大露背造型登場，搞到全場尖叫，他唱出陳奕迅的《衝口而出》，幾位都表現得非常好，令觀眾拍爛手掌。四子合唱《狂人日記》後，由姜濤接力唱《作品的說話》。
MIRROR成員又何止唱跳呢？副隊長AK江𤒹生拎起BASS自彈自唱，曾經手指筋腱受傷的他，差唔多一年沒有彈結他，今晚再次表演他的拿手好戲，令觀眾非常興奮。演唱會一環緊扣一環，十二子一直都沒有說話，直至AK表演完畢，他大叫：「今日係MIRROR第一場演唱會，大家係咪等咗好耐？係咪冇諗過第一個talk位落喺我身上呢？嚟緊我會同一個兄弟合作。」全場已高呼：「Ian！」果然Ian化身彈琴王子登場，「IanSon」合體合唱《蝸牛》和《另一個諾貝爾》。
期間，MIRROR非常識做，特意走近前排觀眾，一邊繞場一邊唱《12》和《神隊友》，好讓粉絲見清他們個靚仔樣，成員沿路揮手、派心心等冧招冧粉絲。隊長Lokman和Tiger台上鬥鼓，Stanley和Jer攞住結他登場，組成MIRROR BAND，唱出《Yellow Fever》、《黑之呼吸》和《收聲多謝》，場內氣氛熾熱。Rock完後，到Ian唱情歌《DISTANCE》和《留一天與你喘息》。
MIRROR首個紅館演唱會今晚開鑼 姜濤更衣室自拍意外令歌衫曝光【下一頁】
Frankie獲安排有演講環節，他坦承自己是MIRROR的「隱形人」，「多謝花姐同MIRROR畀我呢個機會，迫我去講嘢，今日要講係究竟MIRROR嘅隱形人係如何煉成？隱形人好似黑洞咁，不斷吸你入去，好似訪問咁，你只要講慢一秒，你句說話就會被隊友搶走，跟住又會被人話冇嘢講...但我見過好嘅評論，讚Frankie好專業，成個訪問都喺度笑。」雖然自嘲，但全場粉絲報以熱烈掌聲鼓勵，他坦言起初滿有抱負，以MIRROR的目標成為自己目標，沒想到自己卻變得迷失，他一度哽咽說：「MIRROR越來越紅，越來越多嘢做，但我呢留喺屋企對住四幅牆等，我窮到要問人借錢過生活。我越來越冇自信，開始質問自己點解要嘥咁多時間去擔心生活，而唔係諗點去做好自己呢？」
Frankie指疫情後，慢慢回復正常工作，開始接到綜藝節目和劇集，他坦言《IT狗》Never的角色陪他度過低谷，學懂苦中作樂，他說：「今年我重拾希望，我30歲由Dancers都可以轉做MIRROR，點會說服唔到人？我哋一齊戒一個壞習慣，唔好信自己做唔到！先相信自己，Never Say Never！唔止我，全隊MIRROR都值得被人睇到，佢哋只係差一個機會。而家機會嚟喇，難得嚟到紅館，唔係借錢，錢唔使借喇而家，係信心！」
Edan呂爵安大騷琴技自彈自唱《E先生連環不幸事件》，不過表演前鋼琴連環出現問題，Edan執生不斷揮手打招呼，並發揮搞笑本色：「咁樣畀個出場我，益咗我！呢啲show意外好常見，我有嘅係時間。」工作人員搶救時，Edan繼續自我發揮，自言想搞棟篤笑好耐，他笑指這次意外相信只會今晚有，最後更上演《大叔的愛》中的「田牧CP」合體，黑白配合唱《Apple Pie》和跳唱《Elevator》和《Megahit》。
壓軸環節，十二子再次合體獻唱《Boss》、《IGNITED》、《We are》、《一秒間》、《蒙著嘴說愛你》及《One and all》，期間他們不忘答謝所有舞蹈員，全場觀眾呼應網上號召，特別向現場的舞蹈員報以熱烈的掌聲以示鼓勵。
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】
責任編輯：楊安莉