星光路上｜黎諾懿憶當年被調組後喪發脾氣 因小事爆粗鬧兒童組撰稿員

黎諾懿如今已是無綫當家小生之一，又是出名的節目主持，可謂人氣相當。但入行20年的他並非一帆風順，雖然初出道即在劇集《當四葉草碰上劍尖時》擔任男主角，又被安排同林峯、吳卓羲、馬國明、黃宗澤及陳鍵鋒組成「奧運六星」，可惜當年被外界評他是最唔得的一個，結果一度被調入兒童組。

{{hket:inline-image name="06071004.jpg"}}{{/hket:inline-image}}

{{hket:inline-image name="06071002.jpg"}}{{/hket:inline-image}}

同場加映：人間飄浮丨黃劍文一步之念 險隨母親做傻事 學懂珍惜：愛真係要講出口

{{hket:ul-video id="5897"}}{{/hket:ul-video}}

黎諾懿今次接受無綫娛樂新聞台《星光路上》主持潘盈慧訪問，分享入行20年來的起跌。提到出道即獲安排拍《當四葉草碰上劍尖時》及《戀愛自由式》，在《四葉草》中更擔任男主角，令他一度以為自己走紅，黎諾懿說：「好多人以為我第一套劇係《四葉草》，嗰時監製錢國偉講明要一個未曾喺劇集出現過嘅男仔，佢去問《戀愛自由式》監製林志華會邊套劇出先，於是咁就成為第一套劇出街。（出道即做主角變得雄心壯志？）係呀，行出嚟睇唔到人㗎，好招積。（自覺可以走紅下去？）嗰時覺得自己有機會做古天樂，係朝住古天樂、梁朝偉同劉德華方向發展，我咁黑梗係下一個古天樂，真係有咁諗，因為當時年紀細又冇受過挫折。」

婚後事︳陳自瑤首次擔正開工即拍激吻戲 被黎諾懿肉緊撞爆牙：真係好激烈【下一頁】

往後機會一個接一個，他被安排同林峯、黃宗澤、吳卓羲、馬國明、陳鍵鋒組成「奧運六子」，事業應當更上一層樓，可是卻被評是最黯淡的一個，後來更被調去兒童組。黎諾懿說：「嗰時所有報章拎嚟比較，話人哋係主角你唔係，六個當中得你唔得，個個都得、係得你唔得......公司叫我去兒童組訓練吓，我當時直情係反枱，大鬧8樓，因為我要做劉德華嘛，做咩要入兒童組？（周星馳同梁朝偉都是兒童組出身？）係，高層都係咁同我講，但係佢哋係未紅、未有人識前已入去，但我就調番轉喎，有冇諗過我感受？所以喺兒童組嗰陣，我係變咗隻暴龍，導演都驚，記得蓋世寶唔使我出外景。其實經理人都講冤有頭債有主，叫我唔好成日發其他人脾氣，但嗰時係聽唔入耳，好想被人趕走。」

人夫放假約出去滾丨黎諾懿被太太裝APP監視定位 自嘲英文差考AL聆聽竟然轉台？【下一頁】

黎諾懿當年脾氣一發不可收拾，有一次更當眾用粗口鬧爆撰稿同事，「好想同Writer講聲唔好意思，當時題目要問玉蜀黍又叫咩呢，我真係唔識讀，玉咩呢？Writer行過嚟話『搞錯，唔識讀嘅！』，跟住我啲無名火又嚟，我答佢『係呢，咁點讀？』，佢就講佢自己讀咗幾多書，我就用咗無限嘅粗口鬧佢，成場人靜晒。結果我好快畀人趕出兒童組，真係如我所願，但都唔係一件好事，不過嗰段時間學識唔應該咁對人。」

（↓點擊放大睇圖片↓）

黎諾懿形容年輕時是一隻火猴子，性格叛逆又火爆，行為十足暴龍，在兒童組的日子是黑暗及人生恥辱，「入行去到第10年感到人生挫敗，成日覺得係性格決定命運，個人嘅性格真係有問題。回想自己真係太過暴躁，亦都覺得自己好叻，劉家豪都係金牌監製，我都有同佢嘈過。拍完《溏心風暴之家好月圓》後事業一路跌落去，公司都話大家不如算，我都玩咗10年，係時候做番個負責任嘅人，返銀行或做份穩定職業。」正當感到心灰意冷之際，他獲邀返內地參加《舞動奇蹟》第三季，同女拍檔金晨幾經努力贏得冠軍，令其重拾入行初心及學識與人相處，繼續留在圈中發展至今。

撰文：梁榮達

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】