張韋怡7歲仔被同學踢心口倒地 斥老師顛倒是非：冤枉佢試圖滅聲

前TVB女藝員張韋怡2014 年與富二代男友 Michael Poon結婚後淡出娛圈，二人婚後育有一子。張韋怡今日凌晨突然開直播，激動表示7歲仔喺學校被打，而校方更想冷處理問題，反指仔仔係先郁手嘅人，直播期間佢仲多次落淚，事情至今仍未解決。

同場加映：姜濤後悔自爆「A0」要永遠成謎 入行後媽媽朋友突增 姜糖直呼奶奶

{{hket:ul-video id="5727"}}{{/hket:ul-video}}

張韋怡足足開咗1.5小時直播，指5月10日收到學校電話被告知阿仔被同班同學踢心口跌倒，阿仔當時身穿體育服，鎖骨對下仲有個鞋印。佢指當時阿仔係見到一位同學先踢另一同學，佢只係去做「架兩」勸阻：「佢無出手亦無反擊，踢人同學隨即踢我個仔心口，令佢倒下（幸好地面沒有利物、及沒有撞到枱角！），作為媽媽真係好心痛。」佢指當時小息冇老師在場，班長跑去走廊遇到副校長巡班房即求救，佢指當時副校亦表明知道阿仔係受害者。

{{hket:inline-image name="57.JPG"}}{{/hket:inline-image}}

張韋怡又回想起阿仔由學期初，一直有講被一個同學蝦同打，但佢當時就諗到阿仔有啲「噸位」，覺得冇人敢蝦佢而冇上心。不過前排Zoom堂，聽到老師問同學有冇唔開心經歷，而有多個小朋友都異口同聲指被呢個同學打，而當時老師冇警告正係一齊上堂嘅施害同學， 反而叫那個受害的同學「要學識自己調整自己心態」然後終止話題。

當日張韋怡阿仔午餐都冇食，仲講出一番「扭曲」嘅說話接受被欺凌事實：「其實佢每個小息都會揀2個小朋友嚟蝦，可能我一早畀佢揀中呢。」阿仔此話一出令佢更為心痛，指學校處理方法令佢相當憤怒：「我問老師點處理打人嘅同學， 我個仔淚珠開始滾落，我追問下先講班主任竟然冤枉我個仔話佢出手先，叫佢唔好再講大話，如果唔係以後都吾可以返學！ 」阿仔委屈到一直飲泣，張韋怡直斥班主任顛倒是非，令阿仔身心受到二度傷害。

而張韋怡同學校溝通昤校方一直換人，校長亦承認該名同學會有受刺激控制不到自己攻擊其他同學嘅行為，又答應會了解該班主任點解會咁處理事件。 張韋怡指校方社工令佢徹底對學校嘅道德觀、態度、同身為教育工作者嘅「道德標準」感到失望同氣忿：「社工聲稱想我立體去了解件事，結果用咗一個小時去稱讚和欣賞，並游說我原諒她專業去跟進了一年的「問題學生」甚麼學習能力好高、只是不懂與其他人相處、心地善良、不懂表達自己等！」佢表示要求班主任、校長，打人學生家長必須道歉係基本，而「社工」竟然話：「家長，你究竟係咪想解決件事？」佢最後表示事件仍未解決：「你哋學校不做嘢，我個仔和其他正常小朋友，不會甘願做『暴力傾向同學』的沙包， 一句因為佢『特別』 ，我哋唔係讀緊特殊學校呀！」

圖片來源：Instagram

撰文：黃蘊姿