音樂旅情︳方麗盈遭歌廳惡客爆粗鬧 喊住唱 胞姊勸轉做保險：唱歌唔可以一世

歌手方麗盈於80年代出道，當年憑一曲《傷感雨天》爆紅，後期轉行做保險，近年再度活躍幕前，客串過無綫處境劇《愛回家之開心速遞》，又上過《流行經典50年》及《Sunday靚聲王》。日前她接受《音樂旅情》主持人楊紹鴻訪問，分享昔日當酒廊歌手的辛酸，及如何被發掘入行等。

{{hket:inline-image name="04191001.jpg"}}{{/hket:inline-image}}

{{hket:inline-image name="04191002.jpg"}}{{/hket:inline-image}}

同場加映：娛樂直擊| 梁芷珮疫情下出遊拍攝感受良多 「冇人想見到全世界靜止晒」

{{hket:ul-video id="5602"}}{{/hket:ul-video}}

方麗盈的媽媽及胞姊皆是歌手，自小在家人薰陶下愛上唱歌，早期卻被爸爸極力反對，想她專心學業，「我媽咪年輕時都係一位歌手，佢年紀大就轉做製作，屋企好多時播黑膠唱片，記得有鄧麗君、徐小鳳嘅歌，我就拎住歌詞跟住唱，但係爹哋唔畀我咁做，要我畀心機讀書，嗰時仲興體罰，咁我係有啲驚嘅。（有爭取過要唱歌？）爹哋講一個道理係好啱嘅，你就算想唱歌都要識睇歌詞，呢句說話好似淋咗我一盆水咁，呢樣亦係我一種動力，因為我讀書成績係唔好。」她之後明白爸爸的苦心，有次表演英文歌時被人話欠缺感情，不明白歌詞的意思，於是唱歌前去查字典了解整首歌內容，發覺讀書是好重要。

【80年代K歌】憑《傷感雨天》留名因咩事紅唔起？ 滄海遺珠方麗盈客串拍《愛回家》【下一頁】

方麗盈憶當年媽媽接了不少餐廳演出，因此她多了不少替工，演出一場約有70至80元，搵到過萬的人工，「嗰時屋企經濟唔好，加上又搵到錢，咁就好鍾意呢樣嘢，唔係咁多人可以興趣當飯食，又好多謝朋友畀機會我，未讀完書已經檻咗隻腳出嚟……我畀人發掘係夜晚三點唱到三點九，就喺美麗華地庫嘅新麗晶。（爸爸已經屈服？）唔到佢唔屈服，我都亭亭玉立，我哋個子夠高大，大家唔覺得我哋唔夠秤，又老人精少少；再加埋晚裝同化妝又有板有眼，係好多人搵我哋做替工。」

提到昔日歌廳品流複雜，方麗盈直認有不愉快經歷，「梗係有畀人蝦過，畀人指住鬧『燒本數簿』，又唔係得罪人，以前喺新界一啲餐廳入面，有人認得我叫唱首《跳舞街》，佢認得我個名梗係開心，於是同琴師講唱《跳舞街》，但琴師就話唱咗。其實件事係自己唔識處理，但人哋不斷寫紙點唱，嗰客坐正喺我面前張枱……琴師話『一點你就唱，你有無睇吓大場嗰啲阿姐會唔會一點就唱？』，咁我係小朋友自然鵪鶉咁，唔敢出聲叫唱第二啲歌。客人就覺得無面，然之後我被人指住話『你令到我難落台，我都可以令你難落台』，我梗係當場爆喊，之後喊住嚟唱歌。（被迫飲酒會更難受？）逼我哋飲酒又無問題，有時做騷少不免會落台打招呼，有時都會遇到朋友嗌飲杯，我就會掂一吓，現場咁多人佢都係想要面，就算有咩都唔使驚，有咩大家都見到我飲咗佢杯嘢。」

（↓點擊放大睇圖片↓）

方麗盈指當年在餐廳酒廊做替工，半夜三更只有她肯去做，結果零晨三點被唱片公司睇中，「好感恩永恆霍生邀請我去試音，當時佢帶咗監製落嚟聽我咗唱歌，Ok之後同媽咪去簽約。第一張唱片就係《傷感雨天》。」她稱當年全無經驗，唱歌時靠自己幻想一些歌詞畫面出來，想不到唱出來令到大家很有共鳴。至於為何淡出樂壇？她說：「轉咗行，機緣巧合認識到新工作嘅經理，家姐又同我講唱歌唔可以一世，叫我不如做保險，一做就做咗5年……我係無放棄唱歌，一路照唱，唱歌係自由身，可以接又可以唔接，最主要係唱片公司當時唔想我晚晚唱，咁我都要生活，而保險呢行都幾自由，所有時間我都可以安排，有一段時間全職去做保險，及後有好多因素又返出嚟唱，某間夜店高薪邀請我出去，再唱歌就成個人好享受，唱唱吓就自然有人搵，有位就攝返出去。」

撰文：梁榮達

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】