公關災難︳姚子羚「表哥」改圖被用作矯視宣傳 眼科中心出道歉聲明：措詞不恰當

姚子羚入行多年，現年41歲嘅佢越大越靚，雙眼經過化妝後同初入行時相比有神得多。姚子羚多年前一張劇集截圖被網民「惡搞」改圖成超級矇豬眼，由於其中截圖附對白字幕「表哥」，故姚子羚自此多咗個花名「表哥」。

{{hket:inline-image name="b5633e15.jpeg"}}{{/hket:inline-image}}

雖然改圖將姚子羚醜化，不過佢就唔太介意，仲曾經自抽，宣傳自己參演嘅新劇，「表哥嚟啦！既然佢帶畀大家咁多歡樂！希望大家記得支持佢齣新劇《同盟》啦！多謝！」所以話，自己抽自己就係大方，抽人哋水拿捏得唔好隨時變抽火水。

早前某眼科中心就抽水抽出禍！該眼科中心用姚子羚嘅改圖打格，製作廣告宣傳矯視，附對白：「擘大眼吖表哥！」又Hashtag「姚表哥咁樣」、「如有類同」、「實屬巧合」，想帶出眼細都可以做矯視嘅訊息。不過帖文就引起網民好大反應，留言：「咁樣整蠱姚子羚」、「咁大間公司有冇畀廣告費」，有人甚至揚言要抵制。

矯視中心知道抽水抽到公關災難，立即發出道歉聲明如下：「矯視中心就較早前貼文中不恰當使用姚子羚小姐的相片和措詞，對姚小姐所造成的不便，以及對公眾造成影響，我們深表歉意。同時，我們已與姚子羚小姐本人聯絡及表達最深切的歉意，姚小姐亦已接受了我們的道歉。我們將會汲取今次事件的經驗，將來在籌劃工作上慎重處理，在此再次感謝各位對我們工作的關心和指正。」

《晴報》就事件聯絡姚子羚，大方嘅佢一啲都冇介意，回應：「首先多謝網民嘅愛護❤️～冇放喺心～之前都講過希望表哥可以為大家帶嚟歡樂！有關公司都處理咗同道歉，希望件事告一段落啦。」

撰文：黃蘊姿