80、90年代的無綫，培育出不少一線紅星，如周潤發、劉德華、梁朝偉、周星馳、劉青雲等等，當年無綫的長壽綜藝節目《歡樂今宵》是一個訓練口才、應對、執生的好地方，被稱為「少林寺」，演藝圈木人巷。
同場加映：梁詠琪與4歲半童星演母女 唔怕囡囡呷醋：佢當係自己朋友
當年有份參與《歡樂今宵》創作的吳雨，接受鄧英敏的網上節目《老友鬼鬼》訪問，他表示《歡樂今宵》的確是少林寺，他說：「TVB喺70年代對電視嘅概念係唔了解，仲係摸索緊，到咗80年代慢慢發展，90年代至2000年代係黃金時候，嗰陣時培養咗好多台前幕後，幕後有王晶、許冠文、徐克，全部都係戲劇，當時我哋叫菲林組，幕前就更多，有劉德華、梁朝偉、周星馳，全部都係電視台出身。」
周星馳開金口問網民出NFT意見 「我係藝術家就唔好話畀人聽」【下一頁】
提到周星馳曾參與過《歡樂今宵》，但只是一個很短時期，吳雨憶述：「佢喺兒童節目《430穿梭機》，我覺得佢幾得意，當時佢做《黑白殭屍》，成日打啲𡃁仔，我覺得呢條友講嘢幾過癮喎，當時佢已經做咗3、4年，於是我就搵佢嚟做《歡樂今宵》，佢講嘢又無厘頭，牛頭唔搭馬嘴，同我哋傳統許冠文教出嚟，同《雙星報喜》啲搞笑風格好唔同，我哋嘅笑話有個程序，1、2、3，到笑位，周星馳唔係㗎嘛，佢1，就笑㗎喇，一嘢到位，佢做咗《歡樂今宵》7、8個月，終於有一日佢上嚟我寫字樓，佢話『大哥，我想唔做《歡樂今宵》，我冇乜時間，做咗咁耐都想轉下環境，我想拍劇。』我話冇問題，好似Do姐（鄭裕玲）、阿姐（汪明荃）冇劇就返嚟《歡樂今宵》，佢話唔好，想專注一樣嘢，我同佢講演一晚啦，佢都話唔好，我同佢傾咗一個鐘，我覺得佢都有佢嘅抱負，勉強無幸福，最後佢走咗，真係發揮到佢嘅才華，《他來自江湖》又好，乜都好，好多作品，發揮到佢喜劇嘅才華，後期去咗電影，大家都知啦，所以我覺得無綫真係臥虎藏龍，發哥都係啦，嗰陣時佢唔識英文，而家已經係國際明星，無綫當年係一個好好訓練人才嘅地方，我哋有幸參與呢個年代，真係今生無悔。」
前無綫製作總監丨吳雨寄語電視行業要有作戰心態 「畀你獨食又點樣呢？」【下一頁】
無綫當年是電視業的龍頭，就連海外也是收看無綫，提到已故邵逸夫爵士（阿Sir、六叔），吳雨指他為人十分幽默，「當時有7、8位總監開會，逢一個月一次，佢嗰陣時已經80幾歲，有時開會佢都會講吓笑，佢講英文，但佢叫我夏雨，我心諗我係吳雨喎，有個叫汪岐，英文名叫Gilbert，佢就叫佢做George，後尾更正佢，佢話『No，George is best name.』。」
無綫經典劇《季節》破3大紀錄 顏國樑爆六叔先後兩次請食飯【下一頁】
吳雨指六叔除了是一個有趣的人，也是識擦鞋的，吳雨是1992香港小姐競選決賽的節目經理，當時邀請「四大天王」劉德華、黎明、張學友和郭富城擔任表演嘉賓，周星馳亦負責其中一小part的問答環節，吳雨說：「（舞台）布景係獅身人面像，嗰年冠軍係盧淑儀，當晚收視率係100%，隔籬亞視係0%，阿Sir就寫咗一封信感謝我哋，嗰晚做完之後，我記得佢同方小姐（方逸華）企喺度望住，一直望住個背景指指點點，好開心，相隔一個禮拜去開會，佢用英文講上個禮拜香港小姐very good，我話多謝阿Sir，不過very good之後就唔方good，佢講完就辭鋒一轉，問嗰晚個騷幾多錢，我話幾多百萬，佢就面有難色，話做一晚節目要幾百萬，好嘥喎，點解唔攞嚟拍戲呢，佢又唔明紅館嘅租金好貴，所以我精，已經諗定，『阿Sir，唔使驚，呢個布景會留返，我已經諗定用嚟拍科幻片，拍《原振俠》（1992年年底開拍），我叫曾勵珍（負責劇集高層）用多啲獅身人面像，拍多啲畀阿sir睇，跟住阿Sir就同我講very good。」
撰文：黃曉妍
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】