《家族榮耀》大結局︳楊茜堯「甘量宏」上身喪心病狂 三叔羅嘉良向張智霖宣戰拍續集？

由金牌監製梁家樹、陳德修聯合監製嘅《家族榮耀》開播後大受歡迎，除咗資深演員們大鬥演技外，飾演葉彩薇大女Judy、富二代龍文標，同埋甄誠的三位新生代演員 — 劉沛蘅、胡卓希及朱鑑然都相繼彈出。

一直由頭帶到落尾嘅甄芯（楊茜堯飾），上集「道德綁架」親弟甄誠助其毁屍滅跡，大結局更加係奸到極致，睇到觀眾咬牙切齒。今晚（18日）大結局，已經喪心病狂到失控嘅甄芯，為阻止馬世宏（于洋飾）更改遺囑，講盡惡毒說話刺激馬老爺，企圖監生激死臥床在床嘅馬老爺！楊茜堯表情肉緊，同于洋3分半鐘嘅「床戲」一啲都唔覺得長，槍來劍往好有張力。

馬老爺質問甄芯「唔通你對馬家一啲感情都冇？」時，女方不但反白眼兼唞大氣，字字鏗鏘：「我姓甄㗎！我點解會對你哋有感情？」令人不禁諗到當年《天地豪情》中甘量宏（張家輝飾）一句經典對白：「家咩姐？我姓甘㗎嘛！」

{{hket:inline-image name="16.png"}}{{/hket:inline-image}}

結局另一焦點係網民期待已久嘅三叔馬世興（羅嘉良飾）壓軸出場！撈家以型爆造型登場並向Marco（張智霖飾）「宣戰」，即係埋下伏線拍續集？而馬家喺馬世宏離世後，馬家因股權持有量不足陷入危機，幸好最終獲龍家伸出援手，龍少龍文標（胡卓希飾）及昭慈（梁靖琪飾）成為整場戰鬥關鍵人物，二人情路最終能否開花結果亦係大結局重點所在。

（劇透慎入）

不少網民討論《家族榮耀》劇情，久違而熟悉嘅大卡士演員陣容令觀眾過足劇癮，唔少人都大讚情節緊湊有驚喜；又指原本以為係老土爭產劇，睇睇吓先發現似韓式報仇劇；但亦有劇迷認為羅嘉良嘅出現「雷聲大雨點小」，希望續集會由佢去擔正。

圖片來源：大會提供