商台DJ麻利感染新冠喉嚨如刀割 瘋狂休息用中藥吸醫療級氫氣機

香港商業電台叱咤903的節目主持人麻利（鄧慧妍）自我檢測初步確診感染新冠肺炎，佢喺社交平台上載快速自我檢測呈陽性嘅相片，又以長文詳細分享自己經驗，講述自己嘅心路歷程同埋治療方法，呼籲大家最緊要冷靜。

同場加映：張慧儀為保護心臟病養子做長氣媽 Hanson性格太單純：唔鼓勵拍拖

{{hket:ul-video id="5312"}}{{/hket:ul-video}}

{{hket:inline-image name="245348669_1024058411497600_1739513093773773233_n.jpg"}}{{/hket:inline-image}}

麻利指自己休息好多，強調休息對康復好重要，麻利表示自己冇打過針、選擇用中藥、冇食過panadol、有用調頻TimeWaver （整全療癒版微電頻率儀），而且病徵算明顯同好大幅度上落，佢詳細分享如下：

我比較認真對待每種病徵，有人覺得我好似好誇張，但喉嚨痛我唔會三隻字講完，我會以程度去評分，方便中醫理解狀況。

主題：【發冷、高燒】
我有病徵嗰一下係由零去到五十咁明顯，我不嬲留意自己身體，嗰個傍晚突然覺得啲骨好散，少少頭痛。本來諗住响街行多半小時順便車我老豆返屋企，但突然間覺得，唔係喎，呢排我已經冇返屋企食飯、又冇見薯仔，呢刻無啦啦車佢，一陣有事咪XX。所以都係叫佢自己返屋企。真係好好彩。

晚上就精彩啦，好醒目十一點鐘上床瞓，跟住嚴重發冷，最正係房有暖風機，但凍到傻咗冇伸手去開機。發冷四小時轉為發高燒，當時未有探熱針，估計都好高溫，有諗過會唔會因此燒到變蠢。全身好痛，典型重感冒會有嘅皮膚、頭皮赤痛，非常之敏感地痛。又有另一個好彩係我買咗TimeWaver Home，突然間醒起，爬出房攞咗即刻run一下frequency，我想瞓得到咋唔係要即刻康復。好不容易捱到天光。

打畀中醫斷症。因為我知道發燒係有功能，所以冇打算迫自己即刻要退燒（詳情請看【工作細胞：流行性感冒】）攞到探熱針之後，體溫徘徊38.5左右。我中醫已經做咗好多case經驗豐富，個病啲起起落落大家大同小異。印象中人生有幾次重感冒都係咁辛苦。呢日冇記憶，冇食過嘢亦冇興趣、冇需要食。全日响張床度，冇沖涼冇洗面冇郁過。長期接力用timewaver home以及用醫療級吸氫氣機，有效快速放鬆瞓覺同埋減低嗰種感冒式頭痛。

主題：【發燒、冇胃口】
繼續低燒，頭痛、周身骨痛、皮膚痛。味覺得番苦味，但由於苦茶都好苦所以冇分別。唯一係好想食士多啤梨！仲有檸檬、橙等等，唔知點解。老母買來了熊本縣士多啤梨，我屋企有煉奶。味覺上係有層苦，但依然好味。一盤分兩次食（全日只係食咗呢個）夜晚突然有精神去沖涼好開心。

主題：【發燒、退燒、低燒、喉嚨痛】
一瞓醒全身汗，喉嚨超級痛。退燒就出到汗。但亦因為退燒，我都估到今日快速測試應該顯示positive（個個都係咁講）連日嚟成日俾人追問檢測結果，我覺得大家唔好迷戀一個檢測答案。有病嘅人要自己坦白面對身體有唔妥，而唔係望住一條線兩條線嚟決定做乜。仲有。就算你positive，醫生都係斷症下藥（in my case it’s 中醫）點發熱、點發冷、點痛，全部都有關，但同你「被法定乜乜機構話你陽性定陰性」無關。come on，醫病係醫個人唔係醫兩條線。不過仲有人夠膽叫我出街檢測。我喎！燒梗啦喎！行走中的Omicron啦喎！仲出街？自問冇力揸車，即係走去坐車？咁我點確保我冇傳染俾人嘅危險？去到呢度我覺得呢個病贏係贏在個腦。

輸？輸在冇人肯用下腦。但我知，好多公司要求員工有官方證明確診先會唔扣假之類，搞到人人急住出街抵住病要排隊檢測，否則又話你曠工，呢啲公司、呢啲話事人，同香港一樣！病到忽咗！醒未呀大家！我亦都知道好多人唔留屋企係驚搞到屋企人。其實要互相幫助、互相教育，知道「病毒」係一個咩概念。另外我又諗，如果你要强檢感冒，香港長期有大量人口處於感冒狀態㗎，呢刻我甚至反省點解要歌頌「病都返工」嘅同事？每種感冒都係病毒嚟，有病應該好返先出街係常識。原來係常識。病毒同細菌係兩件事，唔知到今日有幾多人分得清呢？

主題：【好多痰、喉嚨痛】
依然喉嚨痛得好緊要！
平時重感冒喉嚨痛係火燒感覺，但Omicron嘅喉嚨痛係你喉嚨畀𠝹刀𠝹傷咗咁痛，每吞一次口水就翻𠝹一次。係刀傷鋒利劇痛。

終於有想食嘢嘅衝動，但只係衝動，因為好易攰。因為病毒品性濕寒，萬萬不能亂食嘢。例如餃子如果係白菜豬肉，有白菜死梗。我媽居然揾到韓國青瓜豬肉餃。但好難食🥲所以我都係煮快熟通心粉。下午又係瞓覺，嗰種一挨落床舒服即刻飄走嘅感覺相當良好。

半夢半醒之間我問Omicron其實你邊度嚟㗎？畫面係洛杉磯Santa Monica山火，我再問，呢個夜晚山火畫面係L.A.定澳洲？答案都係L.A.。莫名悲傷感覺，一定係本來有好多嘢住咗响自己棲息地，你冇燒到人渣都冇，佢唔使轉移或變種。蝴蝶效應不難理解吧。瞓醒覺再查下L.A.山火啲資料，諗起無數樹林、動物避無可避，樹林係地球個肺嚟㗎喎。唔好問點解嗰邊山火呢邊疫情，地球係一個波，任何人做任何嘢都係集體意識一部分，要你食番啲都冇計。

主題：【好多痰、咳】
暫時仲有病徵所以尚且唔浪費快速測試套裝。有胃口但不見得有咩想食。我中醫話佢有同行喺博覽館幫手但中招，中咗之後，作為中醫冇得揀用番中藥，然後食飯係派咖喱雞或牛？呢啲又多汁、辣、油淋淋嘅食物食到所有人咳到Ｘ街又久病不好。我想知邊個高手負責安排呢啲嘢，有冇少少良心？病人喎？新冠喎？食咖喱？再一次感受到醫呢個病係用智慧，唔好講其他嘢。

我趁有精神消毒咗屋企，我知暫時消完毒又會畀本人污染。但我feel better抹乾淨啲嘢一次。然後又上床休息，兩邊鼻都全塞，咳到傻咗，用咗TimeWaver “breath of life”，即刻呼吸到同埋個人放鬆番，冇再咳，瞓到覺。

應付Omicron需要嘅係冷靜，
停止獵巫、Focus on自己同身邊人，
唔一定要食好多嘢、聆聽自己需要，
瞓覺、瞓覺、瞓覺、
熱檸檬水，
維他命B/C/D/Zinc

《晴報》向商台查詢，發言人回應指：「本台主持麻利亞初步確診，最後上班日期為2月14日，工作期間均有佩戴口罩。為安全起見及專業醫生意見，本台已經即時安排清潔和消毒有關工作地點，相關節目的同事，由事發起七天進行自我家居隔離，每天盡量進行快速檢測，並且匯報檢測結果給公司，以麻利亞最後上班日期起計七天，即2月20日，只要《口水多過浪花》之團隊完成快速測試為陰性，已屬安全，2月21日便可如常上班。」

圖片來源：Instagram

撰文：黃蘊姿