周潤發街市開餐派利是見者有份 「民間財神」闊佬銀碼嚇親粉絲

現年66歲嘅周潤發（發哥）近年不時都被行山友同平民食肆嘅食客粉絲「野生捕獲」，親民嘅佢好多時都有求必應，合照、Selfie永冇托手肘，人見人愛嘅佢被大家封為「民間特首」，呢個新正頭佢仲升級做「民間財神」。

同場加映：After Class聲夢四小花感情好零拗撬 與COLLAR風格各異望互相學習

{{hket:ul-video id="5280"}}{{/hket:ul-video}}

現時正值係農曆新年期間，日前有網民喺發哥經常幫襯嘅街市食肆捕獲發哥，事後喺社交平台post同發哥合照，照相中嘅發哥同平時一樣自己揸機selfie笑意盈盈。發哥着住黑色貼身上衣，戴着帽但露出銀色兩鬢，但氣色依然相當好，另一個角度嘅相片都睇到發哥身形依舊修長，仲一啲肚腩仔都冇，呢個年紀keep到咁真係好犀利！

而最特別嘅係網民大爆發哥向食肆員工大派利是，而且仲「見者有份」，呢位網友同發哥只係第一次見面嘅「陌生人」，而發哥竟然派埋畀佢，令佢非常驚喜！更令佢覺得不可思議嘅係發哥隨手咁派畀佢都有$100餡，非常闊綽，唔知同佢相熟嘅員工仲會唔會更大銀碼，但其實就算係統統$100都已經唔係少數目！新年能夠𢭃到發哥呢封大封利是，相信今年一定會由頭好運到腳趾尾，畀着係小編可能會唔捨得使添呀！發哥視錢財如糞土嘅清高「神行」，叫佢做「民間財神」真係一啲都不為過！

撰文：黃蘊姿