煮・野食︳肥媽爆謝嘉怡麻甩貼地容易溝 與陸浩明第13度合體繼續被激奀

由肥媽（Maria Cordero）同陸浩明（六號）主持的無綫全新綜藝節目 《煮・野食》，逢星期一至三晚十點半翡翠台播映。已經係第13次合作主持飲食節目嘅肥媽同六號，今次走出街市同錄影廠，深入港人平時好少去嘅鴨洲、落馬洲、汀角東海岸等探秘，大玩「人在野」就地取材煮「好西」！

同場加映︰「七線人棄王」被嘲奀星拍片自救 「好想搵機會演戲 自己過咗癮先」

{{hket:ul-video id="5243"}}{{/hket:ul-video}}

第三集佢哋出發到元朗大生圍優質養魚場，並邀請謝嘉怡做嘉賓。做慣「阿四」嘅六號今次終不用獨自執行任務，孖住靚女謝嘉怡撐船仔出魚塘撈魚，十分寫意！所謂靠山食山、靠水食水，今集食材全部即撈即煮，肥媽就地取材炮製出「酸梅麵豉寶石魚」及「薑蔥蠔油黃鱔」！

{{hket:inline-image name="01.jpg"}}{{/hket:inline-image}}

肥媽大爆外表斯文嘅謝嘉怡私底下相當麻甩，封佢為「排骨妹」，「佢日日食排骨㗎！佢選完港姐嗰日都係想食排骨飯！如果想溝佢，帶佢食排骨飯、大牌檔、煲仔飯就得喇！」六號聞言即笑指，謝嘉怡是男士夢寐以求對象，「簡直係男士夢想，食排骨飯都唔會嬲！」由於謝嘉怡自小在英國生活及長大，當六號用英文介紹「薑蔥蠔」，豈料卻將「Onion（蔥）」讀成「Alien（外星人）」，肥媽即一面嫌棄糾正其發音；不過六號並未因而「退縮」，仲教謝嘉怡港式英語「Eat Yourself」，非常爆笑！

{{hket:inline-image name="15.jpg"}}{{/hket:inline-image}}

另一集肥媽同六號走入鴨洲，六號反客為「煮」向村民偷師，學煮「薑麻羹」孝敬肥媽。眼見他雞手鴨腳，肥媽忍唔住出手相救，更因對方唔夠醒目而大動肝火，「點解你有呢啲火（戶外爐）？我就要用呢啲火（六號堆砌的炭爐） 呀？你一早好擺出嚟吖嘛！」之後肥媽Order六號到海邊釣魚，但可惜「食白果」，最後要靠「撻肥媽朵」先獲釣魚客送贈大墨魚一隻。肥媽見到墨魚後雖然大嘆「非常難搞」，最後仍三兩下手勢就煮出「秘製醬汁大墨魚片」及「墨魚炒木瓜絲」。

六號接受訪問時透露節目首播反應理想，並指肥媽有意添食，「我聽到好似話第一日跨平台直播收視過咗17點，搞到我同肥媽都好開心。其實阿媽今次拍呢個節目真係幾辛苦㗎，不過佢一聽到個好消息，就即刻話想添食拍第二輯，真係好感謝一班同我哋一齊努力咗咁耐嘅工作人員！」六號仲話神秘嘉賓陸續有來，叫觀眾密切期待。

圖片來源：大會提供

撰文：黃蘊姿