虎年溫情喜劇影《闔家辣》集合笑匠鄭中基、吳君如、梁詠琪（Gigi）及男團MIRROR成員呂爵安（Edan）演出。今次與演戲經驗豐富的前輩合作，初登大銀幕的Edan與《闔家辣》導演鄭晉軒（Coba）接受《晴報》專訪，Edan笑言向來零偶包，所以演出時很放得開，更大曬其招牌反白眼，務求觀眾及「爵屎（Edan粉絲）」發笑。
同場加映：「七線人棄王」被嘲奀星拍片自救 「好想搵機會演戲 自己過咗癮先」
Edan首次拍電影便飾演鄭中基及梁詠琪的兒子、吳君如的侄兒，他自覺十分幸運,「其實我同幾位前輩對戲唔會好難，反而覺得好好玩，喺佢哋身上學到好多嘢，而且佢哋經驗咁豐富，一定唔會錯。」Edan在戲中大玩招牌反白眼，他笑說：「當初參加《全民造星》，唱歌時反咗白眼係無心之失，無諗過會變成自己嘅signature。花姐（經理人黃慧君）鬧係鬧我表演時反白眼唔好睇，但又唔係唔畀我反嘅，但唔好成日反囉，到適當嘅時候先反，否則就唔珍貴㗎喇，咁啱呢部戲有得反咪反下囉，哈哈。」
提到在戲中角色的原型正是導演Coba本人，Edan自爆當日他是最後一位casting的演員，結果被導演揀中。Coba笑說：「我唔係要演員模仿我，而係想搵一個有特質嘅人，直到Edan嚟cast，大家都知道搵到喇！（Edan有咩特質？）都係一份自信，唔係唔知醜，但我哋真係唔知哪來嘅自信。」
Edan自言向來沒有偶包，「其實我做綜藝節目都已經無包袱，不過拍電影與拍《膠戰》真係完全唔同。拍《膠戰》時嘅動作加反應，好自然就會笑出嚟；拍電影就要對白同表情互相配合，所以我覺得中基好犀利，做喜劇演員真係好難，經過今次我明白做喜劇演員係咩一回事。」Edan希望演出不同題材，「其實我唔抗拒搞笑，但拍《闔家辣》之後拍《i.SWIM》同《過時過節》，已經唔再搞笑。不過講真，我真係好想拍一部超級偶像、『中二病嘔血』嘅韓劇做男主角，即係男主角有錢又勤力，但係女主角唔知，男主角暗中做好多嘢保護佢，但呢啲角色多數都唔會搵我做㗎喇。」
雖然《闔家辣》受疫情影響，仍未定上映日期，但四位主角鄭中基、梁詠琪、Edan及吳君如齊齊獻唱主題曲《辣到出汁》，並以Q版卡通造型現身MV，重現戲中一家整辣椒醬的場面，希望為港人集氣，就如黃偉文所填的歌詞「人無恙，就夠喜洋洋」，鼓勵大家撑過疫情低潮！
採訪：黃寶蓮
攝影：林良明
Edan
髮型︰Man Chan@CHIC Private i SALON
化粧︰Giann Cheung @Annie G. Chan Makeup Centre, Mayling Suen @Annie G. Chan Makeup Centre
服裝︰Sandro, Giuseppe Zanotti
珠寶︰Bulgari
場地︰香港瑰麗酒店 Rosewood Hong Kong