一腳踏兩船？︳陳楨怡認定拍拖4年圈外男友 周子揚搶認正印:她未同Andy分開

擁43吋長腿嘅25歲前港姐亞軍陳楨怡（Celina），條件標青嘅佢火速升上神枱，當選後備受無綫力捧。事業得意，愛情都美滿，去年7月受訪時，揚言有信心破「港姐分手魔咒」，同拍拖4年嘅富貴男友Andy走到白頭。不過近日爆出佢另有「隱形男友」，疑似一腳踏兩船！

同場加映：IT狗丨Lokman顛覆IT界毒男形象照鬥廢 笑對與Frankie Stanley被列「下弦」

{{hket:ul-video id="5064"}}{{/hket:ul-video}}

有指Celina同「西貢地王之子」周子揚發展地下情已一年半，二人早喺Celina入行前friend搭friend而認識，周子揚瘋狂力追下二人開始發展，出雙入對見晒家長，周子揚更曾經求婚，不過Celina以專注事業為由拒婚，同時希望把戀事低調處理。

{{hket:inline-image name="240409180_1152685955220295_434359526590599844_n.jpg"}}{{/hket:inline-image}}

周子揚已淡出娛圈，現時為香港一間科技短片平台老闆，不時會為女友提供演藝意見。不過當Celina公開承認與Andy拍拖，令周子揚喺朋友圈之間被笑係「兵」。Celina受訪時表示同周子揚只係朋友，自己現時努力同專心工作，感情事一向低調，又話唔回應唔係事實嘅嘢。

周子揚接受《晴報》訪問時就講出完全唔同嘅故仔，指Celina向佢表示已經Andy分手，但Celina去年7月仍然話同Andy感情穩定，咁就同周子揚發展一年半嘅時間完全重疊，周子揚曾就呢個問題向Celina求證，「我每次問呢個問題，佢都會發脾氣，但我好鍾意佢，會選擇信佢。」同時又話自己一早知Celina一腳踏兩船，但又堅持自己先係正印，「我其實係正印男友，一直秘密拍拖，我一直喺背後陪伴佢，陪佢喺娛樂圈成長。我知道佢未同Andy分開，因為愛……所以我一直堅持住……低調同Celina一齊。」

問到周子揚既然知道女方一拖二，會唔會選擇斬纜？佢冇正面回應：「我跟陳楨怡已經拍拖一年半，感情穩定，我哋好sweet。」問到會唔會覺得自己癡心錯付，成為女神嘅一隻「兵仔」，佢就有少少激動，「我完全唔係兵！我係佢正印男友！大家係有感情，有經歷嘅，一年半相處……佢唔好再講大話，呃哂全世界！」

Celina曾經被英國舊書友爆料指佢「喜愛夜蒲」，爆料人仲話佢長期收兵，而且玩得十分放縱，不過喺香港就因為家教嚴絕少夜蒲。

周子揚感情路上似乎唔係咁順遂，2016年佢同何天兒（前名何傲兒）糾纏多時，二人都係拍拖一年半時女方提出分手。有指係因為何傲兒爸爸何世根畀壓力，希望未來女婿幫到家中經濟，但周子揚家境「唔達標」。當時分手後周子揚坦承曾被苛索生活費，「Gigi（何天兒姐姐何傲芝）曾經親口提出每月畀10萬至20萬生活費，如果畀唔到就唔使同佢妹妹繼續拍拖、交往。」周子揚力撐何天兒係好女仔，但何天兒回應指，報道不實會採用法律途徑追究，又指對方冇見過佢爸爸。

撰文：黃蘊姿