Coffee囝囝上唇腫到阿媽唔認得 伯伯3歲大第一次食藥去醫院

林芊妤（Coffee）囝囝翟德彥（伯伯）因為cute爆嘅行為成為咗網絡紅人，媽媽仲幫佢註冊咗個人IG去紀錄低成長點滴。不過IG已經喺伯伯2歲之後停止咗更新，好彩掛住佢嘅fans仍不時可以喺Coffee嘅IG睇到伯伯近況。轉眼間伯伯已經3歲喇，今日Coffee喺IG訴說兒子經歷咗可怕嘅第一次。

同場加映： 【叱咤後台訪問】Anson Lo@MIRROR直言被林海峰嚇親 張敬軒票數輸姜濤心服口服

{{hket:ul-video id="5021"}}{{/hket:ul-video}}

Coffee話囝囝前幾日話自己上唇入面好痛，佢睇完之後見唔到有乜嘢，只係少少紅，諗住伯伯可能係生痱滋，點知昨日突然好嚴重，「噚日上唇有少少腫以為佢撞到，到瞓覺時腫到不得了，仲有少少發燒，即刻抱住佢去醫院！驚佢食物敏感，怕佢唞唔到氣。見完醫生話係病毒或者細菌感染，應該本身嘴入面有傷口，然後阿仔覺得痛係咁用隻手指整個嘴仔。」Coffee話呢次係伯伯自出世後第一次去醫院，而靚仔樣腫到變咗一隻鴨仔咁，媽媽都完全認唔到佢咁話；同時表示今次係伯伯第一次要食藥，自己亦推晒所有工作陪佢。伯伯除咗嘴仔腫之外，牙仔都有少少變黑，唔少fans都叫佢帶伯伯去睇埋牙醫！

{{hket:inline-image name="270005373_285168030334355_5728766125309409844_n.jpg"}}{{/hket:inline-image}}

Coffee憶述自己去醫院嘅途中好緊張，到半夜睇完醫生返屋企仲發惡夢添！「夢到世界末日……然後我哋必須揀上船或者係留喺度等死，我哋揀咗好努力咁爬上船，然後一個好大好大嘅巨浪打過嚟，醒番之後我有個新嘅老公，好似有一個新嘅生活咁。但唔知點解（工人）姐姐仲係我姐姐，然後BB（伯伯）唔見咗……過咗一段時間，有一日姐姐出咗去買餸，返嚟嘅時候佢突然之間喺門口同我講，『你估下我係街市見到邊個？』然後我衝出去，喺外面我見到BB著住啲爛衫，佢企咗喺門口，成身污糟邋遢好似無沖過涼咁，跟住我衝過去攬住阿仔，佢就係咁喊！」

Coffee話到瞓醒佢都仲喊緊，成日搞到自己精神緊張，話生B真係好大責任，寄語網友要考慮清楚。最搞笑嘅係Coffee喺夢中完全冇理過自己老公去咗邊。唔少fans都留言講笑話「反映現實你想換過個老公」，又大讚佢已經係一個好盡責嘅媽媽，嘗試唔好畀咁大壓力自己！大家都話見到伯伯生病，雖然好心痛，但見佢變咗隻鴨仔咁又忍唔住笑，仲話佢好似梁朝偉《射鵰英雄傳之東成西就》西毒歐陽鋒嘅「孖潤腸」造型。

圖片來源：Instagram

撰文：黃蘊姿