萬千星輝頒獎典禮2021丨譚俊彥被誤會「靠關係」有感而發？ 女藝人大叫「爸爸」視帝面有難色

《萬千星輝頒獎典禮2021》昨晚舉行，譚俊彥（Shaun）眾望所歸憑《換命真相》獲頒「最佳男主角」，加上「馬來西亞最喜愛TVB男主角」，成為雙料視帝，喺台上講得獎感言嘅時候仲喊到收唔到聲，完全感覺到佢有幾激動！

同場加映：【叱咤後台訪問】Anson Lo@MIRROR直言被林海峰嚇親 張敬軒票數輸姜濤心服口服

{{hket:ul-video id="5021"}}{{/hket:ul-video}}

其中Shaun多謝父母嘅一段說話特別感人，「我想同我媽咪講對唔住，呢幾年好少打電話畀你，唔係我唔愛你，係姓譚嘅男人所有嘢都放喺心入面，包括我嘅愛，我愛你！爸爸，上個禮拜我個仔去比賽攞咗個獎，我開心過自己攞獎，今日好開心可以將呢份喜悅帶畀你。」

{{hket:inline-image name="111.JPG"}}{{/hket:inline-image}}

Shaun初出道嘅時候唔多人認識，大家對佢嘅認知都係「狄龍仔」，不過憑住佢嘅努力同出色演技，如今已經獨當一面，仲奪得視帝殊榮，相信大家以後提起狄龍，反為會記得佢係「譚俊彥爸爸」。

頒獎禮中途出現咗一段小插曲，Shaun喺得獎之前接受李思捷玩萬千星輝版《思家大戰》提問，李思捷問咗幾位藝人同一條問題，「觀眾成日誤解藝人攞獎唔係靠實力係靠乜嘢？」輪到Shaun回答嘅時候，佢都未出聲已經有一把女聲大叫「爸爸」，即場惹來哄堂大笑，Shaun頓時一臉尷尬，回應：「我本身想講靠關係嘅……」唔知Shaun係咪多年被誤會靠關係而有感而發呢？

Shaun答中咗呢條問題，不過尷尬之後似乎面有難色，唔少網民都鬧爆呢位女藝人冇禮貌、唔知分寸，搞到人有hard feeling！大家都忙住「緝兇」，開頭有人估係一向多嘢講嘅馮盈盈，討論區上網民嘅理據係「把聲好高亢，似係佢平時個tone」，之不過翻睇片段，見到坐喺Shaun左邊嘅麥美恩、劉珮玥high five，唔知係咪佢哋其中一個開嘅玩笑！亦有網民幫口指呢位女藝人都係講出Shaun嘅心聲，其實冇冒犯，又話如果二人私下係好好朋友，相信Shaun都唔會介意呀！

撰文：黃蘊姿