林作公司新人母暈低望考試改期 狠叫對方「滾」：我的世界沒有藉口

麥明詩前男友林作於牛津畢業，曾經係資深大律師清洪嘅徒弟，但佢已經於2017年放棄做律師，轉投保險業。自此林作經常喺社交平台講述佢嘅業績狀況、旗下的「林作保險」團隊發展蓬勃等等，不時話自己登上業績榜榜首，團隊人數不斷上升。

除咗講自己成績之外，佢多次抽死人水以宣傳買保險嘅做法都備受爭議，唔少人都大鬧佢做法陰騭！今日佢再自爆自己對新人非常「嚴格」，佢post出佢同新人嘅whatsapp對話截圖，留言：「滾。你達不到我的要求，你就別旨意能夠加入我的團隊。替這個行業整頓一下agent質素。明年加入我的新人們， you have been warned.（警告你們。）」圖片中新人同林作講自己媽媽喺屋企暈低，想陪媽媽去醫院做檢查，更講明媽媽之前患肺癌，家中得佢一個，表示會負責番推遲考試嘅費用。

{{hket:inline-image name="265333894_898169004172928_592324336106186635_n.jpg"}}{{/hket:inline-image}}

不過林作嘅回應就似乎有啲不近人情：「在我的世界裏沒有藉口。你幾乎可以每次都有。聽住，係冇藉口，因為成功，係義無反顧。因為你無法釋除我的疑慮，我移除你。」唔少網民都對佢呢個舉動覺得反感，留言：「由此可見（賣）保險嘅人係冇同理心，只係為（向）錢看，有料！」、「成個保險業都畀你影衰晒。」、「如果佢係真，佢嚟咗你個考試，有咩事佢見唔到屋企人最後一面，你係咪負責先？你可以點負責？」、「他朝君體也相同。」

不過林作之後都有解釋佢呢個反應係因為對方唔係第一次「放飛機」：「他之前每次都說又有不同家人不舒服，每次都有新藉口，總之就是放飛機，你覺得攞自己媽媽健康來開玩笑的人，應該獲得支持嗎？」之後又再出多一個post話呢位新人過去幾個禮拜已經四、五次用唔同嘅藉口缺席開會、培訓同考試，自從第一次面試之後就冇再見過佢咁話，反指鬧佢嘅網民相信佢嘅大話係天真。

雖然有機會係呢位新人「狼來了」，但網民亦唔認同林作涼薄嘅做法：「你前一個post所講嘅義無反顧，已經係代表就算人哋老母真係生cancer都應該要去考試！」但亦有小部分網民撐林作，表示為咗「成功」而將工作擺第一位係個人選擇，留言：「呢個係林作嘅廣告，佢將客戶擺喺家人之前（位置）！」

圖片來源：Instagram