《降魔的》龍貓嫂｜黃穎君轉揸「鐵飯碗」月入逾6萬 《東張》做盡下欄採訪有「感召」

《東張西望》主持黃穎君（Burmie）入行8年，曾於《降魔的》演單親媽媽龍貓嫂備受讚賞，近日更於《東張西望》外景採訪時勇闖曱甴屋，被網民激讚專業又勇敢，人氣再次上升。不過有消息指黃穎君已離開無綫退出幕前，兼且返緊新工喇！

同場加映：MIRROR半塊鏡開騷│Jer爆女友捧場但未修補關係 受訪時好兄弟肉緊幫手箍煲

{{hket:ul-video id="4841"}}{{/hket:ul-video}}

黃穎君親證消息，已獲聘為民政事務局媒體主任，昨日正式返工，月薪逾6萬元。黃穎君向《晴報》表示，自己好開心迎接新挑戰，「呢輯《東張》曱甴屋係告別作嘞！我都覺得好難忘好可貴，一路唔公布就係唔知自己in唔in到，因為都有好多candidate（候選人）一齊去面試。我自己溫咗好耐書，咁而家可以用另一個崗位去認識我哋社會，了解緊發生嘅事件。我都好開心，係一個新挑戰，好多謝身邊嘅人支持我。就算有啲劇組我要推……公司對我好好。」

{{hket:inline-image name="d78624538a2f8398081d2f2dea01d164.jpg"}}{{/hket:inline-image}}

黃穎君表示佢呢個決定其實背後係有一個「夢想」，「其實唔係淨係為咗家庭嘅，自己都有一個夢想，尤其做《東張》見到有好多社會問題，究竟係點解呢？究竟點可以解決呢？既然讀咁多書，都希望用自己嘅能力……希望我有呢份魄力、呢種熱誠去幫助到呢件事（解決社會問題）。」黃穎君曾經喺《東張西望》追訪外傭街頭非法煮食、於鬧市「捕捉」巨鼠橫行、揭示疫情下長者嘅悲歌；做盡「下欄」採訪，接觸到唔少社會民生事，令到佢有「感召」解決社會問題。

2012年，黃穎君參加《香港小姐競選》，雖然最終三甲不入，但因當年嘅特備節目《一切從落選開始》，令佢輾轉加入TVB娛樂新聞台擔任主持，自此開啟演藝之路。佢接受訪問時曾言當年係為咗養家還債先投身演藝圈，喺佢讀大學時爸爸媽媽同佢講因生意失敗欠債，連交學費都成問題……於是，黃穎君為幫家人還債，最高峰時同期做5份工，每天放學就去補習，又兼職做客戶服務員、市場行銷、司儀同幫人寫辯論稿，賺錢養家。

黃穎君畢業於香港大學教育系學士，於大學4年級時參選港姐，喺娛樂新聞台任主持期間，修讀香港中文大學社會學碩士。