MIRROR︱Jer柳應廷與女友Kelly疑情變 unfollow男友社交平台合照全刪

人氣男團MIRROR成員柳應廷（Jer）參加《全民造星》時已承認有位圈外女友Kelly，兩人拍拖5年一直感情穩定，不時就會喺社交平台晒合照放閃，不過今日就突然傳出二人分手嘅消息。

{{hket:inline-image name="252872994_325296276074142_8122775351139088846_n.jpg"}}{{/hket:inline-image}}

雖然Jer近年愈來愈紅，工作忙碌，但一有時間依然抽空陪女友，今年7月二人被影到鬧市拖手拍拖，一啲都冇「避諱」，相信女友都有十足安全感。今年10月，Kelly曾在IG貼出兩人以前到日本旅行的放閃相，上月兩人在IG仍有互like。不過今日有人發現Kelly突然Unfollow Jer嘅社交平台，更刪除所有合照；而Jer嘅IG則仍然有follow女友，仲保留同Kelly嘅合照，包括慶祝拍拖兩周年同慶祝生日嘅相。

雖然以上行為奇怪，但Kelly今日IG story post蠟筆小新電影主題曲《春日》，係講小新爸爸廣志對妻子美冴嘅愛同承諾，當中有啲咩寓意引起咗大家好多猜測！有傳媒就此事聯絡Jer，佢就指自己同女友只係普通情侶鬧交。都有網民話Kelly時不時都會「耍花槍」Unfollow Jer，不過今次仲刪除晒所有合照，唔知係咪嚟真？

中學就讀男校的Jer，自言性格比較內向怕醜，只拍過兩次拖，Jer嘅初戀發生於17歲，維持了約10個月，兩人於中學交流團認識，更係由女方做主動；而現任女友Kelly則係出騷時認識，佢指自己雖然怕醜，但因為好耐冇拍過拖就主動出擊。Jer人氣急升，為令女友放心，一有時間就陪佢；參加《全民造星》後，亦曾公開多謝女友嘅陪伴及支持派定心丸。今年3月拍《調教你MIRROR》準備入營前，Jer「上繳」電話前send短訊畀女友報平安，叫佢萬事小心，又提醒女友「M痛要食藥」，暖男到過晒火位。