炎明熹肚痛遲出場腳軟跌低爆喊 譚俊彥嚇死急護女：佢好細個啫

今日中午兩點譚俊彥、炎明熹（Gigi）及鍾舒漫到將軍澳中心出席《商場聖誕裝飾活動》，現場氣氛熱鬧，唔少炎明熹粉絲一早已經到場等待。不過炎明熹最後因為身體不適遲咗35分鐘先現身活動，更當場爆喊，真係我見猶憐。

同場加映：星空下的Liza│姜麗文演技獲肯定成秦沛驕傲 「星二代嘅努力不應被忽略」

{{hket:ul-video id="4691"}}{{/hket:ul-video}}

{{hket:inline-image name="40.jpeg"}}{{/hket:inline-image}}

炎明熹今日準時到場，但之後因為肚痛去廁所延遲出場，期間大會安排譚俊彥同鍾舒漫先上台玩遊戲。35分鐘後炎明熹終現身，當時已然有啲眼濕濕。玩完遊戲之後炎明熹突然腳軟畀台邊Kick親向後跌坐，譚俊彥怕炎明熹走光，見狀即衝上前遮擋，並將佢扶起。

Gigi起身後再要合照，司儀叫現場fans幫Gigi打氣，Gigi聽到大家打氣之後就更加忍唔住，轉身喊起上嚟，跟住Gigi就想走入後台休息，但落台嘅時候又再爭啲「差錯腳」跌親，幸好最後都平衡到。10分鐘過後Gigi先再次出場，司儀問到佢有咩聖誕願望，Gigi又再眼泛淚光講：「保重身體，大家千祈唔好好似我咁樣。」令人非常擔心！

{{hket:inline-image name="10.jpeg"}}{{/hket:inline-image}}

事後Gigi同譚俊彥接受訪問，表示已經感冒咗一段時間，又同大家道歉，多謝大家照顧佢：「可能啲感冒未清，有少少肚痛，上星期仲有少少咳，但之後我都以為自己已經冇事……之前有睇醫生，可能尋晚瞓得唔係咁好，所以頭先暈暈哋跌低咗，真係好瘀呀，大家要保重身體！」佢話自己都冇同公司講病咗，因為覺得自己冇乜事，唔想人擔心。Gigi佢話喺台上時仍「攣住攣住」，之後已食咗腸胃藥。

譚俊彥安慰Gigi，大讚佢表現淡定：「佢好細個咋，我喺台慶見到佢唱歌覺得佢好壓台，我本身今日嚟係想同佢傾多啲偈，等我教女都有個方向，點知未傾到偈就畀佢嚇死我。」譚俊彥又話自己湊慣女，所以反射動作護住Gigi：「我驚佢唔少心走光點算，所以遮住先。其實係好驚嘅咁多觀眾睇住。」記者大讚佢係暖男爸爸，加晒分，譚俊彥即刻話係佢應該做，Gigi都大表感動。Gigi話自己會睇情況再向公司請假，唔想失場任何一個活動。

本身今日活動安排Gigi最後獻唱一曲，不過最後都係取消。

晴報圖片：攝影記者林良明