買樓置業 ︳男友買樓要求資助首期不落名 港女憂無保障：好似貼錢嫁

不少情侶都為結婚買樓問題苦惱，一名港女發文訴說，指男友打算先買樓後結婚，並要求她夾份支付首期，但由於她本身持有物業，為慳稅不能加其名字做業主。對於自己「無名無份」卻被要求幫手供樓，她坦言感到毫無保障，形容就像「貼錢將自己嫁出去」，但擔心拒絕男友會分手收場，令她陷於兩難局面。

同場加映：

Sick問識答｜西藥轉中藥恐致濕疹大爆發？ 中醫拆解皮膚症狀加重原因

{{hket:ul-video id="4630"}}{{/hket:ul-video}}

結婚買樓 ︳未來奶奶要求婚後搬入新界，居港島女生拒妥協分手收場，詳情即睇：【下一頁】

一名女網民近日在「香港討論區」發帖，表示自己持有一個自置公屋單位，目前與母親同住。她又形容自己收入不穩定且需養家，男友積蓄是其3倍，最近他決定落訂買樓，原本打算自行支付整筆首期，卻在買樓後於股票市場輸錢，著女朋友拿「一半身家」幫忙，否則就要「撻訂」。男友要求她支付1成首期，自己會負責3成，日後裝修和供樓費用一起分擔。

事主坦言明白男友難以獨自供樓，然而對方至今尚未求婚，也不肯簽紙結婚後才買樓，令她感到不滿，男友則解釋「話趕唔切同埋婚後財產要一半」，同時「想先買樓後結婚，而你有錢應該要一齊畀」，重申是想與事主同住才買樓；而為免支付額外稅項，男友買樓後不可加事主名字作為業主。

面對現時兩難局面，她形容未結婚先出錢形同一場「賭博」，

「賭佢係真心想同我一齊......而家無名無份，直程就係我Sponsor（資助）佢買樓咁。我而家喺度諗，我畀錢你買樓，我不如拎去裝修屋企，自己住得舒舒服服唔好？仲要畀首期、裝修。」

她有感自己如貼錢出嫁、強迫對方結婚：

「我幫手供我覺得合理，但係層樓冇我名，我又（冇）同佢結婚，點解我一定要幫手畀錢？男人係咁㗎咩？佢唔抵得我有儲蓄，而佢就要拎晒啲錢出嚟？乜同另一半結婚唔係諗住照顧佢㗎咩？我可以唔使佢養、可以同佢一齊畀婚後嘅支出；但我唔明點解一定要我畀首期、去買一層完全冇我份嘅樓？」

男友埋怨：唔幫手就係自私

在買樓困局下問題越挖越多，事主透露與男友交往多年，對方現時已沒有特別「𠱁」她，兩人平日甚少聊天，最多放假外出用餐。她指如自己不夾錢付首期，男友定會埋怨她，「佢會話我計算、唔付出，成件事得佢一個，佢覺得自己係工具人。佢嘅原則就係另一半有能力就要幫手，唔幫手就係自私同埋『豬隊友』，佢覺得我有份住我應該要付出」。相反，她亦認為男友未有替她設想，

「（男友）純粹搵人夾首期同供樓，結婚只係被迫。雖然佢話係因為我所以去買樓，但係我完全冇保障咁......佢嘅錢唔想簽咗紙之後同我一半，我而家好似為咗將自己嫁出去咁貼錢，我好懷疑人生......」

事主指如她拒絕夾錢，相信這段關係便會分手收場，故她希望再跟男友商討，但她亦已做好心理準備回復單身，並為此詢問網民意見，

「我喺度諗，我係咪要咁樣貼錢搵人要？錢係咪真係咁重要？我係咪要因為錢而去放棄呢段感情？只怕佢唔愛我，而我就畀錢買婚姻。至於有冇第2個就隨緣啦，我年紀都唔細，可能儲錢一個人退休好過。如果層樓冇你名，應該畀首期嗎？ 」

網民：點將下半世交畀佢？

不少網民看到帖文後，批評事主男友未結婚就斤斤計較，亦未有事先考慮女友是否有能力供樓，認為二人婚後問題會更嚴重，著事主審慎考慮是否要把一生交託給對方；亦有人認為既然事主有公屋在手，不應為了結婚而「孭條數上身」。

↓ 點 擊 圖 片 放 大 ↓

買樓置業︳婚後想住市區棄買新界樓，港男數年誕3子嘆無力上車，詳情即睇：【下一頁】

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】

每朝索取《晴報》：精明生活．健康家庭．開心娛樂

撰文：蘇麗儀