做乜都錯｜黃翠如IG為4歲癌童打氣遭負評 被鬧偽善造作：成日懶感性懶文青

現年40歲嘅黃翠如一向都好喜歡喺社交平台「分享文字」，不時都用啲似有還無、像霧又像花嘅語句畀大家窺探佢嘅內心世界，配上幾張充滿意境嘅圖片，小清新暨文青風，唔少fans都好like，成日都等佢出post「餵食」。日前翠如分享抗癌小鬥士「神母小戰士Sheldon」嘅照片，再配上一段文字為佢打氣，不過佢呢個舉動令網民覺得反感，仲喺討論區以「有無人覺得黃翠如都幾偽善？」為題開post，引起唔少人討論。

{{hket:inline-image name="212087645_407358617243439_7088243651839611123_n.jpg"}}{{/hket:inline-image}}

翠如喺IG說：「還未經歷足夠世界的甜，就已體驗足夠世界的苦。小小嘅身軀，身上的每一道疤痕，嘗過的每一種治療，你的勇氣都讓我慚愧，願我們都把心底裏的祝福給你和你的爸爸媽媽，接着更艱難的仗，祈求幸運必須陪伴你走。」有網民話覺得佢呢個行為好造作，留言反問她：「好心啦，借小朋友消費，呢種行為好噁心同偽善。」唔少人都加入討論，認同該網民的說法，表示︰「（黃翠如）假開啦，幾年前佢出post話有人用粗口鬧佢，覺得講粗口令佢好不安，之後畀人踢爆佢做有線嗰陣拍節目自己都有講粗口」、「成日打埋啲長文懶感性懶文青」同時都有網民幫口，指佢呢個舉動都係「向善」，「佢識得人哋媽媽，出個post打氣都唔得？好心唔好為反而反啦」等等。

其實翠如打字打到出事都唔係第一次，今年6月佢嘅好兄弟洪永城「小登科」，翠如喺自己社交平台出一篇「祝福」長文道賀，不過字裏行間予人曖昧嘅感覺，網民都話「唔知仲以為洪永城係佢嘅前度」，示威感覺濃！但事後洪永城老婆梁諾妍都話三個人好好朋友，洪永城話翠如嘅文字「好睇、有feel」，仲叫佢再出書添！

其實黃翠如喺2009年出過書，將自身經歷放入佢散文與漫畫集，除咗自己戀愛經驗，仲有取材自朋友同曾經主持有線嘅愛情節目嘅經歷；當時佢話希望透過書中主角「阿Bu」令大家知道愛情未必係一切，自己亦未必會是最慘，畀失戀嘅人多一條出路、多一種想法，做人唔好太灰。

圖片來源：Instagram

撰文：黃蘊姿