各自有家室｜黃翊蔣嘉瑩過從甚密暗角談心 再與人妻傳緋聞：見慣風浪都冚親

前亞視藝人陳存正多年前為歌手黃翊誕下兒子Wesley，由拍拖到組織家庭一直未有註冊，兩人相愛超過20年同甘共苦。黃翊2017年於《流行經典50年》獻唱後鹹魚翻生，再次活躍娛圈。陳存正嘅健康由2010年開始走下坡並患腎病，需長期洗腎，黃翊一直表現緊張，經常陪伴複診，更曾表示捐腎予太太，護妻暖男形象深入民心，不過陳存正唔想見到心愛嘅人為自己捱一刀或者手術後唔舒服，寧願自己每日洗腎。

同場加映： 林正峰游嘉欣出身基層望回饋家人 「呢個時代好難搵到夢想同目標」

{{hket:ul-video id="4525"}}{{/hket:ul-video}}

然而，去年9月林曉峰與康子妮驚爆離婚，有指黃翊介入二人婚姻，黃翊當時立即作出否認，更拖太太陳存正出巡闢謠，事後陳存正回應「唯有選擇相信」。日前黃翊又再惹緋聞，今次女主角係人妻蔣嘉瑩，有媒體影到二人於公園暗角談心，同時拎出電話分享私密、一齊打邊爐及夜間漫步曬月光；而且連見多日，過從甚密！蔣嘉瑩同黃翊都齊聲否認緋聞。

{{hket:inline-image name="11a70f4e-.JPG"}}{{/hket:inline-image}}

蔣嘉瑩指自己而家係黃翊經理人，原來女方已經同舊公司解約後轉咗做幕後，自己有份正職，而家忙緊籌備做黃翊演唱會宣傳，所以差唔多日日見。佢解釋當日同黃翊喺公園，正正係同鼓手傾緊電話，講緊關於演唱會事宜，疫情下餐廳早收，所以先臨時搵個公園坐低傾。蔣嘉瑩又指唔怕會影響夫妻感情，因為老公都知佢係黃翊經理人。

黃翊為自己平反，指蔣嘉瑩幫手搞演唱會，二人最近朝夕相對，「因為成個演唱會籌備好急，好多嘢要搞，尤其有part快歌medley，音樂總監整咗個版本畀我聽……啱啱食完飯出嚟，要搵個位靜靜咁聽，咁啱經過公園附近咪坐低聽！我又唔係攬住佢，又唔係kiss，15分鐘聽完咪走。」對於再同人妻傳出緋聞，佢都表示覺得困擾，不過就話同異性工作總會「有啲新聞」，當係演唱會宣傳咁話。黃翊指太太陳存正反而叫佢唔好理緋聞，話做嘢總會遇到啲困難。

黃翊今日喺電台節目《一圈圈》再次為緋聞解畫，佢話︰「話我斷正？咁我都睇吓到底點樣斷法先！喂，你而家只係影到我坐喺暗角攞住部電話，不斷聽電話、睇電話，其實你見我嘴噏噏，其實我唱緊歌！大家傾緊演唱會medley個programme，當時做個（版本）出嚟我都唔係咁滿意……我嘴噏噏，其實我唱緊歌！歌接歌中間大家tempo都唔同，就變咗談心喇。」黃翊同之前嘅經理人鄭瑞芬經已完約，佢表示：「蔣家瑩做咗我經理人半年，其實我哋都冇簽約，幾十歲人講個信字。」主持人阮兆祥打完場表示只係花邊新聞一則，黃翊無奈回應：「見慣風浪都會冚親！」

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】

撰文:黃蘊姿