李居明爆陳自瑤拒與王浩信復合 唔催Yoyo再生B：佢同邊個追？

堪輿學家李居明今日（15日）於灣仔舉行其第一個梵文書法展，邀請藝人陳自瑤（YoYo）同賴慰玲做剪綵嘉賓，李師傅各送贈二人一幅書法，送畀YoYo嘅書法代表財富，而送畀賴慰玲嘅書法代表添丁，寓意會生夠3個。三人接過作品時李師傅突然「爆料」，似乎知道唔少YoYo同老公王浩信傳咗多年嘅婚變內情。

同場加映：【娛樂直擊】周嘉洛侷住著泳褲魚網裝找數 劇接劇《愛回家》未有歸期

{{hket:ul-video id="4150"}}{{/hket:ul-video}}

{{hket:inline-image name="c1acbaa7b6d504ba7d79bcd6ba13ce7f.jpg"}}{{/hket:inline-image}}

李居明突然踢爆YoYo同王浩信已經「分開」：「我問YoYo係咪復合？佢話唔係。」而旁邊嘅YoYo尷尬到面紅，不停用手撞大師，但就對大師所言不置可否：「不嬲冇回應，私人嘢唔回應。」李居明又指YoYo生女好，因為女兒黐媽咪，有女萬事足，大讚佢囡囡生得高大又靚女，將來可以參選港姐。李居明話唔會催YoYo追生仔時，「意外」再爆料：「佢同邊個追？」此時，YoYo又用手撞他，李居明都繼續「有碗話碗」︰「又撞我？佢唔想復合。」嚇到YoYo即刻解畫，話自己係事業心重，唔追仔，冇時間。

李居明扯開話題讚YoYo背脊靚，批佢2022年後有6年大運行，將會係佢人生高峰，早前獲得嘅配音獎項只屬小兒科，未來會更上一層樓︰「香港最勁係佢，好紅。」之後又再鬼馬地提到王浩信：「YoYo係偶像派，賴慰玲係實力派，偶像派要搬老公出嚟搞吓緋聞，先至係偶像派，佢老公好多緋聞。」話中有話，真係唔知師傅窒緊邊個？YoYo就話自己係「實力偶像派」，賴慰玲表示有計劃追女，李大師叫佢咬住葱，於凌晨5點至7點「造人」，就會生女。

Yoyo再被追問係咪唔想復合，佢口窒窒回應：「師傅成日講笑，佢風趣幽默，你當佢講笑。（你撞到佢手臂瘀晒喎！）都唔知點講好……佢成日將自己諗嘅嘢講出嚟，未必係事實。（唔使復合？）之前都講咗好幾年，知大家好關心我私人問題、私人情況，希望可以關注我工作事業，私人嘢唔講咁多嘞！」同時表示希望可承師傅貴言有6年大運行，至於攞視后，佢話會努力，睇嚟真係好有決心衝事業呀！