黃德斌入行多年，演繹過不同類型的角色，當年在《真情》的「越南」深入民心，到《金枝慾孽》飾演「小祿子」同樣令觀眾對他留下深刻印象，及後憑《火舞黃沙》「宋東陽」一角，在無綫台慶頒獎禮中獲得「最佳男配角」獎項，演技受到大家的肯定，是其事業的一個高峰；離開無綫後，德斌在香港電影《逆流大叔》中飾演「泰哥」，令他第一次獲提名香港電影金像獎「最佳男配角」。早前他再次接受新挑戰，拍攝由ViuTV改編自日本同性愛情喜劇《大叔的愛》，扮演「KK」令他人氣急升，該劇現時在日本朝日電視台播放，好評如潮。
演藝星途看似順利，其實在前期階段亦有不如意的時候，致令他一度懷疑自己患上抑鬱症。德斌日前接受由鄭丹瑞（旦哥）主持《健康‧旦》訪問，他坦言一定要令自己振作，「演咗一啲角色出嚟，（外界）好似有啲反應，但跟住又冇持續，都會有一段好失落、失意嘅時候，經歷過一啲怨、恨，非常之唔開心，甚至乎我睇到一啲資料，我呢啲狀況有機會係患上抑鬱症，但我冇睇醫生，所以唔能夠斷定係咪；有一日我照鏡嘅時候，心諗『你咁嘅衰樣係唔會有咁多工作，又苦口苦面……』於是我下定決心，重新出發，再去振作，做多啲運動，令自己身心平衡，或者睇吓書，去分散自己唔好嘅能量。之後慢慢可能喺外觀上（改變）或者接收到唔同嘅能量，先至令自己可以一步一步走到而家咁樣。最重要係首先要接受一啲不如意嘅事，人總有高低起跌，你要去接受，真正去面對，唔好匿埋，你越唔開心就越要出去，可能去海邊或者搵朋友，咁樣令到我去到另一個階段。」
黃德斌專一愛足14年 曾患抑鬱 低潮感恩老婆不離棄【下一頁】
德斌接拍的ViuTV劇集《大叔的愛》而大受歡迎，他指這齣劇是事業上另一個階段，「我記得拍之前，我問導演『你係咪應該要換人呢？你諗清楚未㗎？我喎？我做喜劇喎！』導演話『係呀！』我諗既然人哋咁有信心，我不如試吓啦，又發掘吓自己可以係點；去到而家出嚟嘅效果，我好開心一齣喜劇令到大家都開心，有啲小朋友見到我，佢話識跳嗰隻舞，我以為佢跳幾吓，原來唔係喎！佢成隻舞都識跳！」劇中德斌與一眾年輕演員合作，對他們可有甚麼意見？他說：「最緊要保持而家嘅心態，大家都好green，大家都要充滿憧憬。因為以我經驗，（之後）好容易產生負面情緒，例如拍完《大叔的愛》跟住出嚟做其他嘢，未必有同樣效果，（演員）會唔會覺得自己做錯咗？或者做得唔好？千祈唔好畀呢啲負面情緒影響到。」
藝人的生活日夜顛倒，食無定時，德斌望住旦哥苦笑說：「都攰嘅！」旦哥大讚他身形好fit，德斌表示：「我需要保養自己，令體能可以應付我嘅工作量，首先我會set咗咁樣嘅心態，你要覺得呢一步係需要嘅、重要嘅，正如你幾忙都要去厠所！仲有一種想法好重要，譬如乜嘢都話要投資，咁點解唔投資自己嘅身體？哪怕每日15分鐘、20分鐘都好，我相信都需要搵少少時間出嚟做一啲簡單運動。當然太攰嘅時候我唔建議去做，或者只係做啲伸展運動，我自己就係咁；當你休息足夠，咁你要去運動，就由你喜歡嘅運動開始，然後再搵啲適合自己嘅運動。」
58歲的德斌指自己喜歡跑步、踩單車、游水，他認為跑步較為容易，在屋企樓下已經可以跑步，這樣就沒有藉口不做運動；加上跑步對身體每個部位都很有幫助，例如心、肺、頭腦，他叮囑大家千萬不要做運動做到過勞，否則會有反效果。2018年，德斌參加了22公里體驗賽，他表示該賽事由黃昏開始，所以晚上仍在山裡繼續跑。
無綫ViuTV劇鬥｜《大叔的愛》上周收視再創新高 網民學阿田阿牧拍拖遊大澳路線【下一頁】
談到飲食方面，旦哥問到德斌在開工時，是否跟劇組一起吃飯盒，還是自己有一套飲食習慣，德斌說：「其實我乜嘢都食，返工係食飯盒，但我而家轉咗食素，轉咗兩年幾，我就同劇組講，我係食素，佢哋就會買羅漢齋飯，但我唔係全素，我都食蛋，咁咪番茄蛋飯。如果自己喺屋企，我起身後，將唔同品種嘅菜、生果，加入蛋白粉、芝麻粉、黑豆粉，其實食素係要講究，因為好多人食素，只係好簡單咁食菜、豆腐，其實唔足夠，好容易唔夠蛋白質。」
兩年幾前轉食素的德斌，指之前看過一些訪問運動員的紀錄片，原來食素對於做運動的恢復會快一點，表現甚至比食肉時更好，於是他決定一試，「試咗之後，覺得自己嘅體能一定冇以前咁差，仲少咗腰痠骨痛，相信係因為少咗炎症；有一輪你覺得我瘦咗啲，就係因為唔使開工，我經常上山跑，今日跑8K，覺得冇乜嘢，到聽朝起身，覺得自己得，於是跑10K、跟住12K……真係幾好，好似少咗啲病痛，更加會持續（食素）。」
撰文：黃曉妍
同場加映：【娛樂直擊】肥仔@ERROR下體慘食波餅向Edan@MIRROR報仇 謝影雪鄧俊文為Jer大打出手
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】