張栢芝貼地街市掃貨同檔主勁老友 善待家傭畀「零用錢」買家鄉食品

現年41歲嘅張栢芝2006年同謝霆鋒秘密結婚，先後誕下大仔Lucas同二仔Quintus。2011年8月張柏芝與謝霆鋒宣布離婚，兩個仔跟隨栢芝生活。2018年栢芝產下第三胎兒子Marcus，幼子出世紙曝光，跟隨母親姓氏，而出生登記並未填寫父親姓名。一個人湊三個小朋友，不過栢芝一直都好樂在其中而且仲出晒名係廿四孝媽媽！

{{hket:inline-image name="20.JPG"}}{{/hket:inline-image}}

栢芝日前就為三個仔準備一日三餐，一大清早未到7點鐘就親自同家傭姐姐去到街市揀食材，原來栢芝非常鍾意行街市，佢留言：「我最喜愛的地方（街市）。好玩過去迪士尼。」上載咗兩條加埋成廿分鐘嘅短片，同大家「街市遊樂團」。

栢芝一去到街市就去魚檔，揀一條新鮮魚煲粥，之後再去肉檔買豬肉整意粉，熟到好似自己屋企咁。而肉檔東主仲特登開一塊新鮮豬肉畀佢，話係靚女特權，氹到栢芝鬼咁開心：「點解啲人話冇乜好朋友，梗係啦，因為你哋冇嚟街市，街市好多好朋友。」之後去到菜檔，透露大仔同佢一樣最愛食椒絲腐乳炒通菜，栢芝後來去到雜貨舖，有粉絲知道佢經常去買嘢，特登成日去等佢，今次等到要求合照，栢芝都好Nice，自揸機自拍，超受歡迎！ 貼地嘅栢芝表示雜貨舖好多時都比超市平幾蚊，「小數怕長計」，仲話有好多超市已經冇賣嘅貨物雜貨舖都會有，所以自己好鍾意喺雜貨舖買嘢。

除咗貼地，栢芝仲係一個好好嘅僱主，佢指自己每次同姐姐去街市姐姐都會好開心，因為每次佢都會「獎勵」佢哋：「姐姐同我哋工作都好辛苦，所以我每次都會帶佢嚟街市嘅菲律賓專門店，跟住我會畀錢佢自己入去shopping，我就唔會入去喇，畀佢哋自己揀，佢哋就好好開心。」栢芝體諒姐姐已經好耐冇得返菲律賓，所以想畀佢食到家鄉嘅味道。姐姐都連聲多謝栢芝，栢芝就同姐姐講「You deserve it」，真係睇見都好想幫佢打工呀！