我老婆嫁左比Mirror ……｜正印老公們畀鏡仔搞到婚姻破裂 開谷圍爐老婆湧入會員一夜激增

男團MIRROR人氣爆燈，工作不斷爆晒show，12個靚仔組團，異性相吸，自然有唔少女性粉絲。除咗獲年輕女生追捧外，唔少人妻、人母都被佢哋俘虜，可以話係老中青通殺，魅力沒法擋！唔少追星族為咗支持偶像，會狂掃佢哋代言嘅產品，仲會課金為偶像賀壽，好似重現番90年代追四大天王嘅盛況！

不過，老婆追星，老公「當災」，有「苦主」 噚日喺Facebook建立「我老婆嫁左比Mirror導致婚姻破裂關注組」，同一眾正印老公圍爐取暖，唔少老公話入咗群之後，覺得自己並不孤單，有比較之下仲覺得自己都唔係咁慘，正能量返番晒嚟！群主同大家講自己嘅「初心」，即刻引來更多老公「共鳴」入谷，「有一日，我老婆愛上Mirror，之後，我就日日都係屋企聽到姜濤把聲、見到Anson Lo個樣下刪一千字……但係，我唔憎Mirror！我只係覺得各位男士需要一個group，盡訴心中情。」

男士們爭相分享自己嘅「慘況」，當中有啲係調番轉，老公愛上咗MIRROR等等。「我老婆嫁左比Mirror導致婚姻破裂關注組」短短半日會員人數已經去到8萬，除咗因為一班老婆踩場，仲因為有好多花生食，趣味性十足，就連經理人花姐（黃慧君）都睇到停唔到，佢話︰「其實啲老公們男朋友們都好可愛，睇啲post睇到唔捨得瞓。」

姜濤、Jer柳應廷今日出席《拉闊音樂會》記招，表示知悉「關注組」，Jer認為部分的留言非常搞笑，特別是人形攬枕，而姜濤一臉認真呼籲大家要冷靜，不要為追星而傷及情侶之間的和睦。花姐說：「好多粉絲send畀我，咁我好耐冇開Facebook，一睇就睇到凌晨4點，雖然係一個訴苦group，不過我睇到好多愛，好多老公或者男朋友為咗另一半做好多嘢，真係好感動。（粉絲認為花姐老公先係最大苦主？）唔係受害者，我老公有同我一齊睇留言，佢可能都想老婆多啲離開屋企呢？」對於苦主們的心聲，花姐續稱：「放心，各位老公同男朋友們，請留意我哋嚟緊《全民造星IV》會打造全新女團，到時大家就有對象，可以追星！好公平！」

同場加映：Mirror傳明年紅館開10場演唱會 Lokman同AK點樣答？

{{hket:ul-video id="3352"}}{{/hket:ul-video}}