輝哥為食遊IV｜蔣志光尊重每個角色從沒Hea演 感激李司棋點醒：要做到好為止

蔣志光前晚（3日）擔任《輝哥為食遊IV》的嘉賓，跟主持人吳錫輝分享他由歌手轉型做演員的心路歷程。他感激前輩李司棋拍攝《真情》時的點醒，令他決定要在電視圈做到好為止。原來他心中亦一直擁有電影導演夢，更視香港導演李翰祥及日本導演黑澤明為其偶像。

{{hket:inline-image name="07043001.jpg"}}{{/hket:inline-image}}

{{hket:inline-image name="07043003.jpg"}}{{/hket:inline-image}}

【降魔的2.0】蔣志光分飾四角連唱歌都兩把聲 當年扮一位歌手唱腔獲賞識出碟【下一頁】

蔣志光被吳錫輝問到自己是否一個「順得人」時，他說：「我唔係一個任由人哋擺嚟擺去嘅人，如果順住個勢去，會令到件事變得更通順、更好時，我一定係一個『順得人』。其實我覺得呢啲叫做敬業樂業，你做得嗰樣嘢，咁就要尊重佢；既然你尊重嗰樣嘢，係咪每一次都要（做得）更加精細？如果時間許可，應該要細心啲去做。唔單止人哋鍾意，你自己都要收貨。（做人太認真？）唔係，因為大部分（時候）都太忙，又有太多嘢做，就唔能夠專注喺一、兩樣嘢。我每一次只能專注做一樣嘢……即係我拍嘢就拍嘢、唱嘢就唱嘢、做訪問就做訪問。若果一日又要我唱又要我拍，我唔得㗎。」

輝哥揀選蔣志光的作品《相逢何必曾相識》，作為1991年至2000年的十首金曲中的第8位。蔣志光開心表示：「記得當時出隻碟寫咗9隻歌，但第10隻無法寫得落。作為一個創作人一定大概知道隻碟賣唔賣得，同埋有冇一隻歌保證一定Hit。突然有一日諗番起一隻歌，叫做《人在旅途灑淚時》嘅一首合唱歌，咁啱當時最盛行卡拉OK，但正缺少一首男女合唱歌；所以當時靈機一觸，不如就寫一隻合唱歌，《相逢何必曾相識》就係因為咁緣故而出現。（一舉成名後去做戲？）發覺好似冇得再寫嘢，其他公司又不斷要求你寫多隻《相逢》。我唔係一個好鍾意翻炒嘅一個人，同埋我好鍾意音樂，如果鍾意音樂就唔應該破壞佢，唔應該麻木自己，好似工廠咁繼續去做。」

蔣志光入行34年惡補英文仍追電影夢 為愛妻堅守一個浪漫約定12年【下一頁】

蔣志光為了繼續在娛樂圈工作，於是決定轉型做演員，一做就是多年。追問他心中這行的伯樂？他說：「王祖藍，憑住一套《老表，你好hea!》（2014年，憑此劇獲得無綫最佳男配角），將我喺電視再次畀人認識，人哋先知我原來係歌手。（眼見你演出時係雕琢過？）自己係一個參與者，都係一個觀眾，你要滿足到自己先得；我拍《真情》時，司棋姐同我講：『當你入嚟拍處境劇時，你就唔好諗住收工』，因為你要享受呢個地方，當呢度係自己屋企，然後先會做好每一場戲。如果剩係諗住收工，你個心就永遠唔喺呢度，個心唔喺度又點拍到好嘅劇？因為呢句說話我就醒，覺得一係唔好做，做就預咗要喺呢個地方做到好為止。（已經做到？）但係都好多年，嗰個針織需要好長時間……所以希望年輕人享受你做嘅工作，唔好厭惡佢，你一定搵到佢可愛嘅地方；你會接受佢，同時唔好忘記佢都會接受你。」

（↓點擊圖片放大↓）

提到心中一直擁有電影導演夢，蔣志光表示：「呢個先至係我中心思想，我最早係先做電影幕後，之後先做音樂。當我係電影攝影機嘅目鏡望出去時，我同自己講，呢個係我將來嘅職業，一定要做呢一行。做一個導演唔係識得拍吓手嗌Cut就得，要知道每個部門做緊啲乜，基本上要識得攝影、燈光、美術及劇本，更加要識得演員係乜嘢；仲有需要有音樂。所以我行緊呢條路，係冇脫離過呢個中心。（死心不息要做導演？）因你冇可能每樣嘢精，但冇可能每樣嘢都唔識，當你每樣嘢涉獵得越多時間，你就發覺原來可以精益求精。（邊個導演係偶像？）香港係李翰祥，日本就係黑澤明。」

撰文：梁榮達

同場加映：入行13年｜林秀怡跟阿旦學戲增值等好角色 成年無拍過劇：嗰排真係好得閒

{{hket:ul-video id="3442"}}{{/hket:ul-video}}

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】