王喜呼籲接種疫苗被指「谷針」 與拒打網民罵戰兼「起底」攻擊

王喜1990年加入娛樂圈，做藝人之前曾經有數年時間任職警察，當時其救人事跡曾被列為香港警隊表揚的十大英雄事件，表現出色。王喜從影以嚟一直形象正面，1998年憑《烈火雄心》中嘅消防員「駱天佑」一角而爆紅，正氣形象更加深入民心。

{{hket:inline-image name="20190619133108_0_20190606154051-0-p1603127921.jpg"}}{{/hket:inline-image}}

近年王喜已少有喺幕前出現，早年佢嘅同性密友患重病，王喜傾囊相助四出尋醫，不離不棄；又力撐捲入貪污案嘅好友，頻繁陪伴出庭，出晒名有情有義。敢言嘅佢仲不時喺社交平台發表自己意見，唔少網民都勁like佢真性情。不過尋日王喜喺社交平台呼籲市民打針，就引起唔少網民留言，最終仲演變成罵戰。

王喜出「大字報」post：「台灣想打冇貨打，XG（香港）有貨冇人打，（有人話）XX（疫苗）打咗等於冇打，話打唔打都要死嗰啲做乜戴口罩出街？怕死吖？#痛係因為中（新冠肺炎）」。佢又指接種疫苗係個人選擇但並非個人嘅事，又表示群體免疫中嘅「群體」二字已說明市民接種疫苗嘅重要性。不過王喜嘅好友志雲大師同佢意見就唔太一樣，佢曾喺電台節目中表示雖然自己決定接種疫苗，但只係因為工作需要，對接種疫苗本身不置可否。

{{hket:inline-image name="235f471ce3c393943bf52fb24a2de898.jpg"}}{{/hket:inline-image}}

唔少網民都指出自己唔想打針：「都係嗰句啦，打咗有99%抗體唔死嘅，我立即去打！呢個根本就唔係公德心問題，而係未合格安全嘅嘢，唔好亂試。唔通有一半人食屎話有抗體，就要跟住食咩？就算要食，以現今世界大把方法可以吸收屎啦，唔使一定要食㗎嘛？有選擇㗎嘛？我哋係現代人類，唔係原始人，大家講道理。」王喜二話不說狂噴網民，並且封鎖佢哋及刪除部分留言，更反駁：「結論：咁你唔好去打，你Ｘ家都唔好去打。」、「你食屎前，食屎後，就係嚟同我傾偈？你咁反對打疫苗，叫你Ｘ家順從你嘅食屎論唔好去打疫苗……你真係食唔少喎⋯⋯」王喜更「離題」指網民用卡通少女頭像，唔敢以真身示人，仲cap低佢哋喺Facebook嘅個人資料「反擊」。好多網民都覺得接種疫苗係個人選擇，而每個人都有自己原因，應該互相尊重。

有唔少Fans經過今次事件後都話對王喜感到失望，指估唔到從佢口中會出現咁嘅言論，王喜再次嬲嬲出post：「第一句就話對我好失望嗰啲，請慳啲！我X街嘅時候，你哋有望過我一眼嗎？#fans誰多誰正確嗎」。有人再次留言指佢太過偏激：「其他人唔尊重你打針嘅自由，係佢哋有問題，你都應該尊重其他人唔打針嘅自由，否則你只係同話你嘅人一樣。嗰頭又話尊重個人選擇，人哋討論吓又連續十幾個留言鬧人， 咁情緒化，而家咩事先？」唔少人都表示今次事件令佢哋對王喜另眼相看。

U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】