黎寬怡博盡採訪少布過落水女星 被包上頸林凱恩寸爆：有你夠啦

東京奧運就嚟舉行，無綫《明星運動會》為盛事預熱，《東張西望》亦派出話題女主持黎寬怡帶大家睇吓游泳同埋拳擊項目嘅花邊新聞。參加游泳項目女藝員，位位都著得密實。而男子組就爆晒肌着緊身褲，大曬Body！

{{hket:inline-image name="5.JPG"}}{{/hket:inline-image}}

着上性感白色小背心嘅女主持黎寬怡一嚟就採訪女子組，以非常高分貝聲線提問︰「各位女神們，首先我要投訴，點解你哋啲泳衣咁唔養眼嘅呢？」林凱恩同眾女都忍唔住回佢：「夠啦！有你就夠啦！」之後林凱恩說只係想挑戰自己，「完成比賽」，仲問黎寬怡會唔會救佢……估唔到一語成讖，喺比賽中途發生小意外！

林凱恩參賽係為咗一雪當年選港姐時抽筋遇溺嘅前恥，希望證明自己，但今次佢再次喺蛙式賽事中太緊張而差啲浸親，堅持完成賽事嘅佢，事後猶有餘悸，「一知道開始即刻好緊張，即刻飲咗水，去到中間頂唔住……好彩掂到地下咋！我真係好想完全呢項賽事，聽到周圍好多人叫我加油，終於慢慢搵番個節奏……開始游到……」

另一邊，男子組嘅焦點就落咗喺佢哋嘅下半身，其中孔德賢着藍色泳褲激「凸」搶FO，「同事幫我買嘅，點知佢買到咁窄！」而前機師筍盤盛勁為雖以三角泳褲上陣，但就冇乜睇頭！佢接受訪問時指最近每星期都有操水，亦因為嚟緊拍劇，操埋肌，但操極都唔夠大隻，話自己都唔知點解冇激「凸」，「吓！游水唔係着三角泳褲咩？我以為個個都係，着長褲會阻水！」仲話唔鍾意「裝假狗」，「我就冇驗其他人有冇塞嘢入去！」對於被網民廣泛討論尺寸，盛勁為顯得相當介意，上番岸之後喺IG連出幾個story抒發情緒。