馬德鐘與老婆結婚28周年放閃 少女張筱蘭氣質清純倒模李嘉欣

日前（27日）係視帝馬德鐘53歲生日，因為佢正忙住拍攝新劇《雙生陌生人》，所以生日都喺工作中度過。劇組好有佢心，為佢準備生日驚喜。大家喺錄影廠拍攝途中突然放宵夜，原來係劇組為佢慶祝，由神秘嘉賓陳煒送上蛋糕糖水慶祝添！

{{hket:inline-image name="10.JPG"}}{{/hket:inline-image}}

事業得意又多朋友嘅馬神，仲有一位青梅竹馬嘅嬌妻，實在係令人羨慕嘅人生勝利組！昨日係佢同太太張筱蘭結婚28周年紀念日，張筱蘭喺微博上載多張珍貴舊相，其中兩張係二人年輕時嘅合照，她寫道：「由我們認識的青葱歲月開始，去到弱冠之年，到現在，再過多三十年，很快就會去到耄耋之年。有幸我們能成為夫妻絕對是三世因緣，希望一直能與你共同進退，時刻保持內心清淨，心無罣礙，獲得真正的自在快樂，就如無門慧開禪師所寫：春有百花秋有月，夏有涼風冬有雪，若無閒時掛心頭，便是人間好時節。結婚28周年快樂！」

而馬神都有喺社交平台上載出呢幾張相，簡單呼應番老婆：「結婚周年快樂！感恩人生有你相伴！」其中一張相，係將二人後生嘅相用老顏Filter加工，相信係馬太想像中嘅「耄耋之年」，咁多年都咁恩愛，真係好難得呀！

外界一直都讚馬太有明星級嘅外貌，同馬神係金童玉女，非常合襯。唔少網民將focus放咗喺馬太嘅「少女時代」，發現原來佢當年同大美人李嘉欣撞樣！馬太戴住一副「文青」幼框眼鏡，清純又有氣質，同初出道嘅李嘉欣好相似，唔怪得馬德鐘愛足老婆咁多年啦！