婚後即懷孕丨岑杏賢宣布佗B 5個月過首個母親節 怕「小器」守秘密:一切正常先分享

藝人岑杏賢去年11月尾成為人妻，早前消失於無綫處境劇《愛．回家之開心速遞》演出，身形又有少少發福，即時傳出懷孕消息，但佢就一直都冇正面回應傳聞。 

相關新聞：《愛回家》Icy被交代回美探親暫別劇組半年 岑杏賢發福疑懷孕安胎以10字回應【下一頁】

{{hket:inline-image name="121054618_1552570321601491_4838124341906165952_n.jpg"}}{{/hket:inline-image}}

今日岑杏賢趁住母親節喺社交平台分享佢嘅孕照，宣布已經懷孕5個月嘅喜訊，指自己唔使再守「秘密」，佢同丈夫都好感恩好開心同覺得好幸運，仲有唔夠5個月就可以見到迷你版嘅自己，仲形容BB係佢哋今年最珍貴嘅禮物:

「我同老公等待做好BB詳細檢查，知道各方面一切正常，先分享呢一份喜悅！一日未真正當媽媽都未能夠體會到由懷孕開始心態上、身體上帶來的各種變化！呢一份奇妙旅程……好多謝我媽媽，妳絕對是我最大的榜樣，最大的驕傲！未來日子，還有很多東西向妳學習，向唔同嘅媽媽學習！YES! I am ready We are ready! 祝願天下媽媽、準媽媽母親節快樂。I Love you Muｍ!」

岑杏賢接受無綫娛樂新聞台電話訪問，她表示：「多謝大家祝福，我即將做媽媽，呢份母親節禮物非常有意義同巨大。點解選擇母親節公開呢？因為BB剛剛照好晒詳細結構，知道一切正常，咁先同老公一齊分享呢份喜悅。BB係計劃之內，我哋非常非常之感恩，我哋一嘗試就已經有呢個小寶貝，好期待出世嗰一刻。其實我同老公都知BB姓別，只不過我哋都想保持少少神秘感，之後再同大家公布啦！」她直言未知是否荷爾蒙影響，令她胃口有所轉變，突然很想食甜品和辣麵，現時佗B舒服很多，但總是坐不定想出門走走，但丈夫比較緊張，吩咐她不要行得太急。

而岑杏賢幾日前先同「2LINE黨」嘅好姊妹一齊慶祝湯洛雯生日，一班姊妹一早就知道好消息，都好戥佢開心，蔣家旻受訪時表示之前岑杏賢有同佢分享照超聲波嘅過程：「令我覺得BB生命好奇妙，我收到消息時係非常替佢高興兼感動！我知佢口味變咗，想食濃味嘢同甜嘢。前排有見過佢，但呢排我忙拍劇，自己連母親節餐飯都未請媽咪食，所以等我有時間會買甜嘢請佢食。」不過佢就話做契媽責任太大，做BB好朋友同佢玩吓就算。

而朱千雪表示：「戥佢好開心呀！知道佢好鍾意小朋友，知道佢一定會係一個非常之好嘅媽媽！」湯洛雯就話希望BB快高長大，連佢都未知BB性別，最緊要健健康康，開開心心。