何鴻燊逝世近一年家族傳喜訊？ 劉嘉玲爆何超蓮竇驍「已婚」感歉疚

近日劉嘉玲喺內地主持新節目《對照記》，首位嘉賓邀請到賭王三房千金何超蓮，大談同賭王嘅生活點滴，節目播出後反應熱烈。劉嘉玲事後接受傳媒訪問，更無端爆超蓮已經結婚，而且指佢「嫁了一個我們中國很出名的男演員」，令人即刻諗到女方已經同男友竇驍拉埋天窗。

{{hket:inline-image name="z7ydTNUJyy1rf6IyiDijxg4mnOOnrak7pNlyf6TZcn8.jpg"}}{{/hket:inline-image}}

賭王何鴻燊去年5月離世，至今仍未安葬，何家眾人仍係守喪期內，超蓮亦出名係孝順女，所以消息一出大家都好震驚。然而，超蓮男友竇驍接受訪問時斬釘截鐵表示並無其事，「沒有結婚，現在還在守喪期」，咁到底係咪劉嘉玲口快快講錯呢？

（點擊放大睇圖片）

劉嘉玲之後喺微博出Post，上載自己同超蓮嘅合照留言，好「面懵」咁向超蓮、竇驍道歉，「非常抱歉！在最近的一個採訪中說『你們已經結婚了』，經了解這是一個美麗的誤會，非常抱歉給你們倆添麻煩了，祝你們開心幸福。」 超蓮之後都有轉發其微博，再婉轉否認已婚消息，「剛工作完才看到新聞。謝謝嘉玲姐的祝福，有好消息再通知大家！」

不過唔少網民反而唔多信佢哋出嚟否認，認為咁大件事冇可能搞錯，估佢哋係咪有乜嘢苦衷先要暫時隱瞞婚訊？亦有網民相信劉嘉玲真係一時擺烏龍，覺得何家嫁女一定風風光光、大鑼大鼓咁話。