余慕蓮大步檻過留醫5個月出院 身形消瘦中氣十足：最緊要返屋企

現年83歲嘅資深藝人余慕蓮（魚毛）去年11月因肺纖維化入院，期間情況危殆需入ICU，並要插喉及用呼吸機幫助呼吸，更一度要打強心針，幸好最終大步檻過。其好友鄧達智在翌月透露對方已拔喉管，可自行呼吸及進食，而且轉到普通病房。留院幾個月，魚毛姐情況已經好轉，而且有接受物理治療，上周獲醫生批准出院。

{{hket:inline-image name="85159ac9ac10395056b45cf3215093f6.jpg"}}{{/hket:inline-image}}

今日約下午2時18分，魚毛姐戴住黑超、紅色帽，用醫院毛巾包冚全身，她坐在輪椅上，由3名醫護人員陪同之下出院。魚毛姐甫見記者即開心揮手，又中氣十足說：「多謝大家關心！醫生叫我唔好接觸咁多人，因為有好多菌，有變種病毒呀！」又謂可以出院返屋企好開心，然後醫護人員就安排她登上復康小巴。

（點擊放大睇圖片）

魚毛姐坐低一刻，見其手、腳非常纖瘦，不過說話非常好中氣，問到現時是否可進食固體食物，她說：「要斬碎佢先。（最想食乜嘢？）冇諗過，最緊要有得返屋企。」至於問到是否由家傭照顧時，她未有回應，只是再一次對住鏡頭揮手。