禮金爭拗｜港男娶老婆遭外母索150萬禮金 大哥狠批撳住搶「叫佢唔結好過」

結婚雖是二人之事，但現實上卻往往牽涉兩家人「角力」。有香港網民於討論區訴苦，稱年近30歲的弟弟打算與拍拖10多年的女友拉埋天窗，女家卻要求高達150萬禮金，遠超男家預算下正打算應否要求弟弟「唔結就算」。對此大部分網民均指女家「開價」過高，稱做法儼如「賣女」，認為事主細佬應三思而後行。

網民親弟娶妻預38.8萬禮金 女家「還價」150萬超預算

事緣有網民於連登討論區發文，指自己細佬最近打算與拍拖10多年女友結婚，卻因禮金問題而苦惱。事主自稱屋企首次有男丁娶妻不懂計算禮金，父母打算「攞個意頭」故提出38.8萬，惟女家開價卻令事主家庭感不可思議，

「對家開150萬，係咪應該叫細佬唔結好過？」

再要求新樓「加名」 事主斥「撳住搶」

事主於帖文指自己與準弟婦家庭經濟環境均屬中產以上，但自己家庭情況要比對方更理想，稱對方「知我屋企有家底先獅子開大口」。事主又稱準弟婦應為獨生女，而自己父母早前已為二人「Full Pay」買樓以作新婚之用，惟對家仍有意要「分一杯羹」，

「對家仲想落埋佢個女個名，黐線撳住嚟搶。」

網民狠批開價「離地」倡暫緩婚事

150萬禮金事件引起網民關注討論，網民普遍指男家開出38.8萬禮金已是高於平均，認為3.8萬左右經已足夠，事主則回應強調指家中首次有男丁娶妻「唔知價」，且即使經濟狀況較好仍覺得150萬禮金過高。

有人則指除非女家家境極佳，否則索150萬禮金加上要求新居加入女兒名下，明顯是女家父母打算「謀財」供退休之用，建議事主細佬小心行事。亦有不少人建議事主細佬可暫緩婚事，拖陰幾年禮金要求自然下降，又或者推搪說仍在儲錢即可。