方力申3個月翻脹8kg再次減肥 驚嚇自爆「屙拔甩」入院檢查大腸

現年41歲嘅方力申舊年12月曾以間歇性的禁食，一天只食一餐，加埋生酮飲食，一個月後勁減6.7kg（14.77磅），當時佢仲有喺社交平台上載爆肌相，效果非常理想弗到漏。不過話口未完，今日佢上載自己嘅上磅片段，拍攝後短短3個幾月，佢嘅磅數又反彈，估計最少翻脹8kg。

{{hket:inline-image name="136402474_111383487530779_6289561525830971709_n.jpg"}}{{/hket:inline-image}}

小方除咗上身衫上磅，體重達79.4kg，然後又用電子磅反影show凸肚，有啲無奈咁講：「總之又嚟啦，凸個肚腩畀你睇！」佢留言：「我諗住聽日開始減肥。邊個一齊？我自己打算做番keto + intermittent fasting... 各自修行，得閒交流下，或者一齊做live運動都得。哈哈！ #79.4kg #鬼叫你肥呀頂硬上」。

日前小方又上載咗一條短片鼓勵大家兼鼓勵自己，仲搞笑咁話自己冇飲醉：「減肥係世界上最容易嘅事，做唔到只係我哋唔夠想做到，唔好話要大隻，大隻係好難。但淨係減肥一啲都唔難，有咩係好難？疫情之下冇工開，你要我搵十萬蚊係難。但減肥，係淨係管自己個嘴巴咋喎，唔食咋喎……或者淨係食得健康啲喎，淨係肥、傷身啲嘢唔食咋喎，忍口都做唔到，所以lose weight、減肥、減脂係好易，但keep就真係好難。我一年減幾次肥，成功減到肥得幾日，係減完保持先難……一齊努力啦，有感而發呀！」

（↓點擊圖片放大↓）

今朝一早小方又再Post片，同大家分享佢減肥心得。戴住口罩嘅佢好輕聲，原來佢身處醫院：「早晨呀，大家係咪真係想減肥先，除咗磅重之外，最緊要就係度下自己啲三圍呀……大髀、手臂咁樣。有時你磅數未必會跌，但你多咗肌肉，因為你會做運動嘛。多咗肌肉少咗脂肪，咁你個體重冇變，但可能你其實係瘦咗一個圈。點解我咁靜呢，因為我今日係要做個腸檢查……前嗰排呢，屙blood（血）呀。哎呀……冇嘢嘅冇嘢嘅，可能係熱氣啫，不過醫生都話係要檢查吓嘅，有健康嘅身體，先至可以減肥吖嘛！」

屙血真係可大可小，相信唔少粉絲都會好擔心，小方回覆《晴報》指檢查結果顯示佢冇大礙，仲話自己可能只係因為食咗辣嘢，幸好只係虛驚一場！人冇事先可以做到世界冠軍吖嘛！