明星兒童節｜鄭伊健梁朝偉曳到爆呔又爆頭 邊個大眼妹細個勁似關之琳?

今日係4月4號兒童節，TVB粉絲專頁嘅「大台寶藏篇」專誠搵出好多珍貴片段，梁朝偉、鄭秀文、佘詩曼、陳淑蘭等大曬童年照，當中除咗證明何謂天生明星相之外，亦印證何謂「女大十八變」，難辨相中人！

{{hket:inline-image name="2.PNG"}}{{/hket:inline-image}}

片段開始時關之琳拎住一張大眼妹嘅童年照，呢個小妹妹睇落去同佢好似樣，不過原來係劉嘉玲嚟。劉嘉玲話呢張相係佢細個嘅時候喺蘇州嘅照相館影，當時呢張相仲畀照相館曬大放喺門口做生招牌，真係天生一副明星相！

而佘詩曼、吳麗珠同鄭秀文嘅童年照都係一眼就認得出，完全冇變咁滯！鄭伊健就分享自己童年曳嘢，話自己新年嘅時候去拜年要穿西裝，但就同朋友去踩roller，搞到「爆軑」爆到去膝頭位置，結果自己急急去廁所縫補，非常搞笑。

梁朝偉亦大爆自己細個同同學仔打交，推推撞撞之下佢畀同學仔推落樓梯撞穿頭，當時戴住嘅白手襪染滿血跡，返到屋企仲見到額頭有個黑色嘅窿，認真牙煙，但好彩都無損佢之後嘅靚仔樣！

（點擊圖片放大）

之後主持人拎出一張某位香港小姐嘅童年照，張堅庭就話相中人係肥妹仔，先估吳君如，再估係林憶蓮，不過通通都唔啱。原來呢個肥妹仔係陳淑蘭，只有梁家輝估到，蘭子話自己身上嘅肥肉冇晒，但面上就仲有keep住baby fat認真可愛！