「味之天使」阿橙丨鄭瑩瑩延期結婚一年終「嫁得出」 與黃智雯同屆選港姐啤梨蘋果到齊

「味之天使」阿橙鄭瑩瑩喺2007年參選港姐後加入娛圈，打滾6年離開無綫後轉做公關，之後再同友人合資開公關公司。2019年獲圈外男友求婚，但之後因疫情關係，婚事被迫延期。較早前女方喺社交平台分享佢哋「過大禮」嘅喜悅，金器、海味同禮餅等樣樣齊，仲話終於有人「落訂」，藝人朋友謝珊珊都笑佢恨嫁！而噚日，婚禮喺delay咗成年後終於舉行，唔少圈中嘅朋友都有到場賀佢「嫁得出」！

{{hket:inline-image name="122616722_128003798775479_2790147746249719482_n.jpg"}}{{/hket:inline-image}}

同佢同屆選港姐嘅趙希洛、黃智雯都好戥呢位識咗14年嘅好姊妹高興，黃智雯留言：「相遇、相知、相助、相惜。我們最愛錫嘅鄭瑩瑩要做幸福人妻啦，能夠找到與你相愛相許的Mr.right，好替你開心！Love you gals so much，一切盡在不言中!」趙希洛亦表示感恩佢哋由同事成為好朋友，展開人生另一個旅程。

(點擊圖片放大)

除咗兩位港姐朋友，鄭瑩瑩都有唔少喺娛樂圈工作時認識嘅好友，到賀名單包括有尹詩沛、謝珊珊、蕭麗芠等，而佢擔任「味之天使」時認識嘅「啤梨」張韋怡同「蘋果」何卓瑩，大家亦成為咗好朋友，人緣非常好！謝珊珊大讚鄭瑩瑩嘅婚禮非常夢幻，彷彿帶一班賓客離開咗香港。見佢嘅婚禮係喺戶外進行，場地佈置得非常用心，除咗放滿鮮花之外，仲喺草地放置咗一個扮熱氣球嘅影相道具，相信賓客們淨係打卡都已經好開心！