劉德華放低「偶包」分享電髮過程 59歲頭皮健康情況曝光網民驚詫

現年59歲嘅劉德華正忙於拍攝電影《金手指》，觀眾好快又可以再入戲院一睹佢嘅天王風采。電影未放映之前，粉絲可以睇佢嘅抖音一解「單思」之苦。向來乜嘢社交平台都唔玩嘅華仔兩個月前開咗抖音帳號，好短時間已吸引超過5,700萬名追隨者！以往對私事三緘其口嘅華仔都好識做，早前同大陸fans進行直播期間，主動提起老婆朱麗倩，更自爆當年唔擺酒原因。華仔嘅fans都好疏爽打賞，真係淨係做直播都夠養家！

{{hket:inline-image name="e77171c2d7d031224b5cbf494401122a.jpg"}}{{/hket:inline-image}}

今日華仔再「回饋」抖音fans，放低佢多年嚟嘅「偶像包袱」，拍低喺髮型屋電髮過程同大家分享，佢留言：「很久沒有燙髮，為了電影需要，弄得頭上一捲一捲的，緊張！」華仔又搓手又咪眼，睇落好似有啲不安，之後髮型師開始為佢落電髮水加電髮捲。滿頭髮捲嘅華仔畀fans笑佢有啲似包租婆，不過最令fans震驚嘅都係佢頭皮嘅健康情況！

喺一邊拍攝嘅朋友不時zoom近華仔嘅頭皮，眼見華仔頭髮依然好濃密健康，同後生仔冇分別，喺佢身上完全見唔到脫髮危機！不過有網民依稀見到佢頭頂上面有白頭髮，以佢年紀其實都好正常！

（點擊放大睇圖片）

華仔就不忘chok住向鏡頭揮手say hi，鏡頭再一轉，華仔已經洗完頭，髮型師仲幫佢整緊造型，電完髮嘅華仔輕撥髮邊，似乎好滿意！不過好多人都覺得好𢱑頭，事關華仔電髮前後嘅造型幾乎冇分別，證明咗華仔對自己本身個髮型已經好滿意！