《愛回家》Bonnie丨林凱恩胞兄傳拖糧工程爛尾失聯 兄妹檔做《安樂窩》介紹室內設計

林凱恩（Iris）拍攝無綫處境劇《愛‧回家》演Bonnie上位，原本形象正面唔多是非，不過早前流出艷照引起小風波，今日一不離二再有負面新聞傳出。但今次就唔關佢自己事，而係佢哥哥疑似因生意同人有錢債糾紛，身為藝人嘅Iris就慘被牽連。

{{hket:inline-image name="1607936412_14733234455ff966d09d564-1024x576.jpg"}}{{/hket:inline-image}}

Iris嘅哥哥林祥晉係一名室內設計師，尋晚有人在Facebook發出「尋人啟事」，指身為「設計公司老闆及裝修判頭」嘅林祥晉，原本負責北角同沙田兩個私人屋苑住宅嘅裝修工程，但自3月19日後林祥晉就失去蹤影，有指該兩個單位嘅業主怕寓所裝修爛尾已報警處理。除此以外，更指林祥晉拖欠裝修工人薪金，該名網民指自己較早前已經出過「尋人啟事」，出post不足1小時林祥晉主動聯絡要求刪post，但之後又再失聯。

今日又再有網民喺討論區出post，直接指名道姓話係「TVB藝員林凱恩親生阿哥」拖糧，負責嘅裝修工程爛尾兼失聯，更喺IG私訊Iris「追數」。Iris同哥哥林祥晉感情一直要好，佢早前主持節目《安樂窩》時亦有請哥哥做嘉賓，兄妹檔介紹室內設計工程，兩兄妹做節目嘅合照同短片亦有喺林祥晉室內設計公司Facebook專頁出現。

（↓點擊放大睇圖片↓）

《晴報》就事件聯絡Iris，不過佢就似乎對呢件事唔係好清楚：「暫時而家呢一刻未直接聯絡到佢了解發生咩事，而哥哥結咗婚搬出去住之後，其實大家都係大時大節先見；另外，同哥哥從來都冇干涉對方做嘢。如果真係有件咁嘅事，大家都係成年人，要負責番自己做嘅嘢，而我能夠做嘅就只係專心工作，好好照顧自己同媽咪。」