【鮭魚之亂】為免費食壽司郎可以去到幾盡？身份證改名「超粗大深海鮭魚王」未算最癲

香港都有嘅日本「壽司郎」，最近喺台灣推出優惠活動，只要姓名有「鮭魚」（港稱三文魚）兩個字嘅顧客，可以喺3月17同18日享用「一枱6人免費任食」優惠，結果掀起了一場「鮭魚之亂」。根據戶政事務所統計，近日有逾百人趕去戶政事務所改名「鮭魚」。究竟呢班人為了免費壽司改名可以去到幾盡？

據了解，改名多數係20歲左右嘅年輕人，佢哋認為只要優惠活動結束後，再改回原名就ok。當然多數人只係將名字改名為鮭魚，例如陳鮭魚、黃鮭魚、劉鮭魚等，但係都有人改名做鮭魚漢堡、鮭魚炒麵、爆震鮭魚等玩嘢姓名。

{{hket:inline-image name="0319WLfeaturepage868.jpg"}}{{/hket:inline-image}}

好似台灣媒體報道，有一名張姓警員，為求參加這次活動，特別喺自己個名後面加上「宜蘭之子超粗大深海鮭魚王」，但係事件驚動咗佢上級，據報呢名張姓警員第二日已經改回原名，並對自己嘅行為造成社會關注感到抱歉。

不過唔少後生仔就好有創意，點擊即睇改名可以去到幾盡（來源：網上圖片）：

咁多騎呢名當中，如果你以為「李圭歸瑰規硅閨邽龜鮭魚於瑜餘娛虞盂妤漁愚愉于余蝓腴予輿渝嵎榆算了我想得好累隨便啦」40字就係最長，就實在太天真了。新北市戶政陳姓男子天外有天，佢個新名長達50字：「陳XX有震天龍砲變身XXXXX（FB名稱）於二零二一三月十四日與XX（女友名）穩定交往中愛妳愛一生一世此生想帶妳一起吃鮭魚」，內容除咗有關鍵字「鮭魚」，仲順便向女友說會愛佢一生一世，問你死未。

不過咁，原則上台灣人一生只有三次改名機會，如果呢次改成鮭魚之後再改返原名，就已經用咗兩次，所以下次想重施故技都幾難。或者唔少人都知，香港無限制市民改名次數，如果「壽司郎」喺香港搞「三文魚」優惠又Work唔Work呢？可惜同樣嘅「改名食免費餐」招數喺香港應該行唔通喇，因為港人每次改名，都要搵律師造張改名契，最少都要收500蚊律師費，之後先可以去人境處更新身份證資料，唔似台灣咁零成本。

講起改名，香港中文名最長只可以六個字，而之前曾經引起關注嘅改名事件，就有「激烈的海膽」同「小小燕子」。話說2014年有位法國來港的交換生Humphrey Dupont，有次喺海邊踩到海膽，於是佢忽發奇想將中文名改成「激烈的海膽」，而更早就有電視節目報導一位身形圓潤嘅中年女子，由於嚮往燕子能自由自在飛翔，於是將中文名改成「小小燕子」，英文係「Little Little Bird」。

編輯：唐婉琦

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/