林穎彤一歲父親拋妻棄女流離失所 媽媽欲跳橋輕生因Bella清醒

藝人林穎彤（Bella）曾經歷悲慘童年，1歲多時遭生父拋棄，林母獨自撫養兩個女兒，在巨大經濟壓力下，無計可施，抱着Bella行乞度日。Bella十歲時成為童星，憑亞視劇集《萬家燈火》而為人認識，當時她與媽媽亮相藝人鮑起靜主持的電視節目親述身世，而這段18年前的片段近日網上瘋傳。

{{hket:inline-image name="121608389_362066598272256_8693077436610281651_n.jpg"}}{{/hket:inline-image}}

片中Bella與媽媽重返曾行乞的葵芳天橋，當時林母邊哭邊說，指丈夫於Bella一歲時拋妻棄女：「佢鍾意咗個女仔變咗心，我已經盡力挽救，我時時喺屋企煲湯等佢，佢係都要一意孤行搬出去住，我都冇辦法。當時生活好徬徨，大女9歲，穎彤得1歲，我好傷心好失意，但我又搵佢（老公）唔到，希望見到佢、叫佢返嚟，或者畀啲生活費，但我搵唔到，等唔到，惟有孭住個女去乞錢。9個月晚晚9點至12點孭住佢行乞，落雨先唔出嚟，冇法，佢個病又難醫，冇錢買奶粉，當時好絕望，好彩有人教我申請綜援。」

由於生活陷入困境，林母在走投無路的情況下，帶同一歲半的Bella於葵芳天橋行乞九個月。每次重回天橋都勾起林母的痛苦回憶：「冇錢買奶粉、冇錢交租，又唔敢返屋企，就喺天橋流離浪蕩，不如就跳落去。望落去下面時，穎彤差啲跌落去，孭後面差啲瀡滑梯瀡落去，好彩捉住佢腳仔，嚇到我，次次行過天橋都會諗起嗰幕。」

（↓點擊圖片放大↓）

Bella當時聽到母親淚的告白，不禁落淚，並非常懂事，立志長大後要照顧媽媽：「聽到好突然，諗唔到我細個時，佢係咁樣養我，想佢唔好咁辛苦，第時開心啲，唔好再住呢啲樓（公屋），買層靚啲嘅樓畀佢住。想大個搵多啲錢，等媽咪扮靚啲。」林母聞言淚崩：「媽咪唔係要住靚樓，最緊要係你哋兩個身體健康！」