一張相兩個版本｜馮盈盈認修圖「編輯風格唔同」 暗寸江嘉敏原圖直出:冇可能扮冇P

今日張振朗、馮盈盈、江嘉敏、賴慰玲與劉佩玥出席記者會，為即將播出嘅節目《解構心機女》作宣傳，焦點都落晒喺「是非孖寶」馮盈盈同江嘉敏身上。事關日前二人先後Post出佢哋嘅合照，雖然係同一張相，但二人就疑似好有「機心」咁P圖，有網民更指佢哋各自P靚自己再整醜對方，令不和傳聞更似層層。

{{hket:inline-image name="d632534d-4592-41cd-adfd-449a05b1fe0e.JPG"}}{{/hket:inline-image}}

馮盈盈接受訪問，被問到係咪同江嘉敏「破冰」：「我咪寫咗囉，sorry係走冰先啱，真係講緊我請嘉敏飲嗰杯珍珠奶茶啫……因為知道嘉敏之前第一日過嚟做主持一定會有啲緊張，佢前晚都特登開post話心情好激動，所以第二日希望請佢飲嘢為佢打氣。但我真係未夠細心嘅唔好意思，真係冇預過你（江嘉敏）生理期，就冇準備到熱朱古力，下次會準備埋喇，放心！」

{{hket:inline-image name="00.JPG"}}{{/hket:inline-image}}

被問到有冇更加了解對方，江嘉敏就話節目唔係圍繞佢哋兩個，但就知多咗身邊發生嘅八卦事。問到二人有冇諗過唔接呢個工作，江嘉敏就話有機心嘅人唔代表唔好，如果一個人想達成一啲目標，有機心係好事嚟。馮盈盈就指從來冇考慮過有工作唔接：「對任何嘅工作機會都好樂意嘅，同埋今次呢個節目都好有趣，我哋係期待、興奮。」江嘉敏話係自己人生第一次有主持崗位可以做，更加唔會推，但就話如果有裸露成分就盡量少接啲。

{{hket:inline-image name="32.JPG"}}{{/hket:inline-image}}

記者問到二人會唔會覺得對方係心機女，盈盈就話如江嘉敏所言心機女可以係個正面標籤：「好似幫人打氣都會講『畀心機』啦，可以代表你有冇心思，有冇努力去做，我哋同事都係畀好多心思，好努力做到最好，所以大家都係心機女囉。」

講到P相風波一事，江嘉敏先係答到口窒窒：「我又唔知……邊個P肥我先，邊張相先你講。」盈盈即刻幫口：「你指邊張先？」江嘉敏即扯開話題話自己今次做主持有啲吃力，又話有啲網民嘅comment都係為咗得到藝人嘅注意。記者追問被P肥有冇令佢感覺受傷，江嘉敏就話冇咩可以傷害到佢。不過講到佢媽媽都被攻擊佢就話有啲扯火：「我知大家都好享受言論自由，但有時真係唔好太過火，我係公眾人物，我要接受善意同惡意批評，但我妹妹、爸爸、媽媽並唔係公眾人物，佢哋係普通市民，冇必要受到傷害。尋日有一下係嬲咗，你攻擊我冇所謂，唔應該殃及屋企人同朋友。」

馮盈盈就大方承認自己P相：「張相係我助手幫我哋影，原圖喺助手電話，我覺得大家執着係咪P圖……可能只不過係我哋各自嘅編輯風格各有不同。」但江嘉敏就繼續兜：「同埋影相嘅角度都唔同，因為在場都有其他同事有影……」盈盈續指審美眼光好主觀，疑似暗寸江嘉敏話自己係「原圖直出」：「我從來冇講過我啲相係冇P圖、冇Filter，如果我有P圖我係好大方承認，冇可能P咗扮冇P，觀眾眼睛咁雪亮係一定會見到嘅。」盈盈話自己返去都有諗「個底」係最緊要，所以今朝6點半起身跑步，出汗去水腫，自然唔使P圖！

江嘉敏不停叫馮盈盈師姐，馮盈盈現場即時話自己「受唔起」：「唔好嗌我師姐啦，我哋同年㗎咋，同埋你14年就入行，又拍港台劇又拍電影，（江嘉敏即時反駁話冇咁早），維基咁寫，嗰陣我仲喺大學讀緊書未選港姐，所以我叫你師姐先啱嘅。」江嘉敏續指主持界盈盈先係前輩，盈盈打圓場話大家要互相學習。

{{hket:inline-image name="88e5fc41-8a57-47b1-ab6d-cab4b901c765.JPG"}}{{/hket:inline-image}}

二人都話唔怕喺不和傳聞下合作會「越搞越禍」，影響形象。江嘉敏話佢哋由頭到尾都冇不和：「大家硬係要發酵，都多謝大家抹黑令我有呢個工作機會。」馮盈盈就話呢個好有火花好吸引，好多人都留言話好期待，節目效果好好。