余慕蓮危殆後首報平安聲音沙啞 長期臥床生褥瘡:希望我可以食嘢

現年83歲嘅資深藝人余慕蓮（魚毛）去年11月因肺纖維化入ICU，由於細菌入肺，魚毛要插喉助呼吸，情況一度危殆，更有傳佢患罕見血癌 ; 幸而大步檻過，現已轉往普通病房休養。魚毛姐度過危險期後，今日首次接受港台DJ車淑梅電話訪問報平安。

{{hket:inline-image name="05931cb8e62fde3babd9db2a25d50b0d.jpg"}}{{/hket:inline-image}}

留醫3個多月嘅魚毛姐喺訪問中聲音沙啞，在電話中指自己已拔除喉管，可以傾電話，「係呀，幫我拔咗條喉，我幾個月冇講嘢……拔咗三、四日，我幾個月冇講嘢……但唔可以講咁耐，唔夠氣。」車淑梅指好多人都好關心佢嘅情況，問魚毛姐有乜嘢想同粉絲講？魚毛姐話：「我希望早啲可以食嘢，因為我而家係飲流質嘢……希望我可以食嘢……我有力先至可以起身，我而家仲係瞓喺張床度，大小便都要用尿片，醫生可以畀我講吓電話已經好開心，已經打咗 (電話) 畀十幾個人。」

（ ↓ 點擊圖片放大 ↓ ）

魚毛姐幾個月未曾「正常」進食令佢不禁嘆氣，「唉，乜嘢都想食，幾個月都未食過嘢……同房嗰啲 (病人) 又早餐、午飯、晚飯，但我唔食得。醫生話要等營養師，要照X光，睇我識唔識吞嘢，如果唔識吞呢，就驚住鯁親。」雖然聲線沙啞，但精神不錯，她說：「我有做物理治療，醫生唔敢講我幾時可以出院，要睇情況……食得嘢先至有力起身，長期瞓床背脊都損咗。多謝你哋關心，想快啲出院。」車淑梅叮嚀魚毛姐要好好休養，認為好人有好報，祝福佢可以早日康復。