伍詠薇諗「縮數」新年最怕派利是 自認孤寒巧妙避開大廈看更出門

伍詠薇（伍姑娘）一向都非常真性情，亦正因為佢呢個性格，觀眾緣一直都唔錯。伍姑娘日前就開Facebook直播大爆自己諗「縮數」，喺農曆新年期間「扭盡六壬」只為派少幾封利是，非常爆笑！

{{hket:inline-image name="1.JPG"}}{{/hket:inline-image}}

伍姑娘先分享自己今年農曆新年做咗啲咩，之後講到自己對農曆新年嘅感覺：「細個父母捉我哋3兄妹去拜年，又要趕巴士，之後得逗到利是開心一下……」佢話細個嘅時候覺得班大人講嘢好悶，所以從小到大都唔係好鍾意農曆新年呢個節日。

伍姑娘之後就講到大個咗就唔係幾唔喜歡派利是畀人，會採「避年」策略：「我會派利是嘅……但都唔係好想派好多利是囉，因為我孤寒嘅，好肉赤，啲錢難搵……陰公，好難撈、好難搵食，所以紅紙一張收到都大吉大利。所我平時唔使開工呢，我「吽」到十九先出街，我宅女冇咩所謂。」

（↓點擊放大睇圖片↓）

不過佢就話自己試過忍唔住出街，但就諗計避開大廈看更：「我直接由屋企搭𨋢去停車場唔經大堂，派少一封就一封。」伍姑娘話自己出街見到啲觀眾朋友認得佢，佢就會好心虛：「我成日夾住包利是好似驚有人打劫咁，其實最似賊係我……有一年我出到街，有啲星斗市民認得我，其實佢見到我冇咩，新年見到我好喜慶，諗住行埋嚟「恭喜發財」，未必想「笠」我嘅。」伍姑娘即刻示範自己當時擰歪面，扮睇人唔到，佢自己回想起笑到流晒眼水！

伍姑娘叫大家新年見到佢黑面唔好出奇，話自己只係心虛同孤寒想派少封利是，又叫大家如果收到10蚊同廿蚊唔好怪佢，非常坦蕩蕩！唔少觀眾都留言大讚佢風趣，仲非常欣賞佢嘅唔造作同坦率添！