2007年港姐冠軍│張嘉兒兩個愛女充當消脂神器 豬扒變靚太 慨嘆：「瘦得太遲」

張嘉兒相隔3年再拍劇，在無綫新劇《陀槍師姐2021》中飾演宣萱閨密翁珠迪，與「威Sir」許紹雄演一對「老夫少妻」，並擦出有不少火花。已有一段時間冇拍劇，嘉兒坦言開工頭幾日非常緊張，對住鏡頭表現生硬，連早已背好嘅白對都忘記晒，要用一啲時間先適應到。佢同宣萱今次已經係第二次合作，2012年一齊合作過電視劇《飛虎》，更因而成為好朋友 ：「喺呢套劇入面係演佢表妹兼閨密，而現實中我哋都有見面食飯，所以，同佢一齊演戲佢冇畀壓力我，壓力都係自己畀自己。」

{{hket:inline-image name="untitled-20.jpg"}}{{/hket:inline-image}}

張嘉兒自言再拍劇感到緊張，始終演戲經驗不多。（圖片：晴報)

《陀》劇中，嘉兒有一幕要色誘「老公」許紹雄，佢話：「事前冇特別傾要點拍，不過，Benz哥（許紹雄）有提議我著件Tube，視覺上會逼真好多，咁我信佢嘅專業。我老公對我拍床戲又冇介意，仲問要唔要同我練習下。」嘉兒同Benz哥首次合作，對方係前輩級，喺對方他眼中自己屬小妹妹，起初都有啲緊張：「因自己拍戲經驗唔夠多，仲要冇拍咗幾年，怕自己表現生疏拖累大家收工，結果都拍得好順利，同埋劇入面個個演員都係好Nice，拍得好開心 。」

至於劇集出街後，網民大讚嘉兒「靚咗好多」，回想2007年張嘉兒當選港姐冠軍後，慘被網民封為「豬扒港姐」。估唔到十多年後，張嘉兒已成為兩女之母，反而變了「靚太」，對於一洗「豬扒」之名，佢表示：「主要係瘦咗好多、健康嘅瘦，上鏡係好睇好多，疫情前我一星期游兩、三次水，而家就會同老公跑步。其實兩個女幫我消耗最多體力，同佢哋落公園放電，我跟住佢哋後面跑、幫佢哋拎單車呀，陪佢哋玩幾個鐘等同做運動冇分別。」

（↓點擊放大 睇圖片↓）

陀槍師姐2021｜許紹雄張嘉兒相差35歲演夫妻 TVB劇中老夫少妻都有圓滿結局？【下一頁】

張嘉兒話參選港姐時最肥，有一百二十幾磅，生完BB後瘦咗十幾磅，佢笑言：「可惜瘦得太遲。（成功平反？）我唔知呀，我希望啲人唔好話我整容就得，因為我真係健康咁瘦，同埋做咗媽媽開心咗，可能都有關係。」

另外，兩個囡囡分別4歲大嘅Leora及1歲細女Hannah都好可愛，嘉兒不時拍片上網分享親子生活，Leora眼仔碌碌，喜歡對著鏡頭講嘢，滔滔不絕表現自己，甚得網民歡心。嘉兒近日為Leora開設網上頻道，成為小小YouTuber，嘉兒話：「冇諗過啲網民咁鍾意佢，阿女係幾有表演慾，鍾意唱歌，語言能力都幾高，我會幫佢拍一啲益智嘅題材，好似做勞作、畫畫、唱吓歌咁，見阿女拍得好開心。」不過，嘉兒稱呢個只作為女兒其中一個興趣去做，以唔影響佢功課為大前題。

（↓點擊放大 睇圖片↓）

撰文：衛紫敏

攝記：楊嘉傑

圈中牛仔牛女│陳煒自知犯太歲碌柚葉洗衰氣 謝東閔年初一內至外換新裝 【下一頁】