穎之友丨孫泳恩放棄回流與丈夫共患難 林穎嫺與首屆港姐冠軍同病相憐?

前香港小姐季軍林穎嫺現時長居美國，早前開設咗YouTube頻道「林穎嫺Wing4U」同大家分享佢嘅日常，佢仲會不時隔空線上訪問好友，唔少都係久未露面嘅前香港小姐，令觀眾非常驚喜。今日佢就視像訪問首屆（1973年）港姐冠孫泳恩，原來疫情下二人都已經好耐冇見面，佢哋背景相似，感情非常好，訪談中聽得出都好掛住對方！

{{hket:inline-image name="3.JPG"}}{{/hket:inline-image}}

而家已經65歲嘅孫泳恩洗盡鉛華，但對目前嘅生活感到滿足。孫泳恩成為首屆港姐冠軍後得到好多出鏡機會，拍劇、主持等工作備受重用。不過孫泳恩爭取與香港首富李嘉誠見面，更獲得對方支持舉辦第一次地產展覽，踩入商界而且非常成功，當年可以享盡錦衣玉食。

{{hket:inline-image name="fe17c13e206e7dfb30880ac1a7c2398e.jpg"}}{{/hket:inline-image}}

孫泳恩曾兩度離婚，與第二任前夫育有一子，直至遇上法籍練馬師賓康。二人於1994年結婚，誕下女兒賓盈盈，1999年賓康遭馬會除名，到美國發展，孫泳恩嫁雞隨雞，帶著8歲兒子及3歲女兒一同到洛杉磯定居。丈夫於南加州發展不如意，輾轉到佛羅里達州發展，而孫泳恩本身習慣咗洛杉磯生活，唔想多變，後來回流香港陪伴母親。不過孫泳恩丈夫突然身體不適，孫泳恩急急到佛羅里達州照顧丈夫，並喺當地展開新生活。孫泳恩對佛羅里達州讚不絕口，所住地方環海，日日都陽光與海灘，更邀林穎嫺到當地過退休生活。

（↓點擊放大睇圖片↓）

林穎嫺同孫泳恩都住喺洛杉磯時不時會聚會，而家疫情之下二人只好靠視像通話。林穎嫺講到二人當年喺香港都好富裕，不過回想起放棄一切都係值得：「放低榮華富貴都係為咗仔女，嗰陣好多工人，唔知小朋友喺咁嘅環境下長大會點，喺呢度（美國）幾有錢都係自己做。」孫泳恩亦表示認同，更指廿年前自己連洗衣機都唔識用，但去到美國就要一腳踢好「淒涼」：「以前咩都要用最好，袋呀、傢俬呀、衫呀……不過而家覺得一切簡單、舒服就夠。」

二人都身在異鄉，互相扶持下眨眼過咗廿年，孫泳恩亦到咗「收成期」，阿女跟隨爸爸嘅腳步做練馬師，而佢讀到博士嘅囝囝畢業後到倫敦嘅金融機構工作，近日仲收到好消息，總公司約佢調去紐約，一家人終於唔使四散喺幾個國家。孫泳恩大半生勞勞碌碌，依家總算可以享受生活。