家長注意｜男童港鐵車廂瞓長凳踩扶手 母懶理撳電話姐姐無力勸停

本港新冠肺炎疫情反覆，市民外出乘搭交通工具時都特別注意衛生，惟近日一位媽媽攜兩子及工人姐姐外出時，卻未理長子躺睡座位、腳踩扶手，儘管工人姐姐多次勸阻無效，媽媽仍只顧玩手機，該港媽行為令網民甚為不滿。

Facebook專頁「生仔要考牌系列」周四（28日）刊登一篇投稿，投稿者指日前在港島線銅鑼灣站上車，當時車廂滿座，期間聽到遠處有一名男童在叫囂，並看到男童「喺度擰嚟擰去」，站在旁邊的女傭嘗試制止，媽媽則牽著幼子，對男童的行為「剩係話兩句」。

男童躺上長凳腳踢扶手

當列車駛至北角站，由於很多乘客下車，車廂有大量空位，男童便與女傭同坐一排，媽媽則抱著幼子坐在另一排。期間男童坐上長椅後，隨即「瞓晒兩張凳，話好攰」，並把雙腳連鞋放上長椅，事主形容：

「當正自己屋企張梳化，得閒踩兩吓張凳，得閒瞓住咁踢吓個扶手。」

 （↓點擊圖片放大↓）

無視女傭勸籲  母懶理低頭撳電話  

事主續指，女傭當時不停輕拍男童，著他勿把雙腳放上長椅，惟男童未有理會；而媽媽則無視長子舉動，一直抱著幼子及低頭看手機。事主認為，雖然媽媽要照顧幼子，同行亦有女傭幫忙看顧，但她亦不應只顧看手機，把看顧男童的責任全然交予女傭手上，

「我見到嘅，係佢好忙係咁撳電話，又或者佢幾百萬上落，我唔知。但都唔係老奉咁款，唔講我以為佢哋係兩家人！」

離開無人清潔長椅  事主怒轟：可唔可以畀少少衛生常識？

事主又指，鞋底有很多細菌，當男童用腳踏上長椅後，下一位乘客在不知情下坐上，就會沾污衣物，認為該行為影響公共衛生，

「可唔可以畀少少衛生常識？有冇疫情都好，都唔係咁樣踩張凳！最後，（佢哋）落車當然都無抹凳，奉勸咁多位抹一抹先好坐低。」

帖文在網上引發熱議，不少人稱曾有相似經歷，「有啲細路仲好鍾意踩住張凳『睇街』，但啲家長從來都唔叫佢哋坐番好，一係就跪喺張凳度周圍踢」、「有次個老母睇住個仔係咁踢，成個鞋印印喺我條褲都唔理」，有網民怒斥該家庭「無家教」。

 （↓點擊圖片放大↓）

研究指鞋底菌量比馬桶座板高3倍

美國休士頓大學（University of Houston）早前一項研究指出，鞋底藏有大量致病細菌，「困難梭狀芽孢桿菌」（Clostridium difficile）比馬桶座板的菌量高3倍，可引起腹瀉問題。

家庭醫生方玉輝早前接受《晴報》訪問時亦稱，鞋底每日都會接觸街上的細菌，如接觸鞋底會增加細菌傳播機會，故提醒每日回家應先除鞋，再將全對鞋噴70%消毒火酒消毒；或用1:99漂白水浸地布，然後把鞋放在地布上殺菌。

內容獲「生仔要考牌系列」授權刊登。

男童獨自出走廊玩耍危站單車 探半身出窗鄰居拉回地面救一命，詳情即睇：【下一頁】

每朝索取《晴報》：精明生活．健康家庭．開心娛樂

撰文：賴天兒